विश्व बैंक र एसियाली विकास बैंकबाट साढे २७ अर्ब रूपैयाँ ऋण लिने सरकारको निर्णय

काठमाडौं । सरकारले १८५ मिलियन अमेरिकी डलरबराबरको ऋण स्वीकार गर्ने भएको छ । सोमबार बसेको मन्त्रिपरिषद् बैठकले मुलुकको डिजिटल पूर्वाधार र दीगो विकासका लागि दातृ निकायबाट कुल १८५ मिलियन अमेरिकी डलर (करिब साढे २७ अर्ब रुपैयाँ) बराबरको वैदेशिक ऋण स्वीकार गर्ने निर्णय गरेको हो ।

बैठकले ‘डिजिटल नेपाल ट्रान्स्फरमेसन’ परियोजनालाई अगाडि बढाउन दुई ठूला दातृ निकायबाट ऋण लिने प्रस्तावलाई स्वीकृत गरेको हो । यस परियोजनाका लागि विश्व बैंकबाट ५० मिलियन अमेरिकी डलर र एशियाली विकास बैंकबाट ४० मिलियन अमेरिकी डलर गरी जम्मा ९० मिलियन अमेरिकी डलर ऋण स्वीकार गरिनेछ ।

यो रकम नेपालको डिजिटल प्रणालीको सुदृढीकरण र सरकारी सेवाहरूलाई प्रविधिमैत्री बनाउन खर्च गरिने बताइएको छ ।

मन्त्रिपरिषद्ले ‘दीगो र समावेशी विकास’ परियोजनाका लागि विश्व बैंकबाट प्राप्त हुने ९५ मिलियन अमेरिकी डलर बराबरको सहुलियतपूर्ण ऋण पनि स्वीकार गर्ने निर्णय गरेको छ । यो परियोजनाले नेपालको वातावरणीय सन्तुलन, सामाजिक समावेशीकरण र दीर्घकालीन विकास लक्ष्यहरू प्राप्त गर्न मद्दत पुर्‍याउने अपेक्षा गरिएको छ ।