काठमाडौं । निर्वाचन आयोगले गत फागनु २१ मा सम्पन्न प्रतिनिधि सभा सदस्य निर्वाचनको अन्तिम खर्च विवरण सार्वजनिक गरेको छ । आयोगका प्रवक्ता नारायणप्रसाद भट्टराईका अनुसार निर्वाचनमा कुल ५ अर्ब ३७ करोड रुपैयाँ खर्च भएको छ ।
आयोगका अनुसार निर्वाचन प्रयोजनका लागि ७ अर्ब ८१ करोड ५ लाख ७६ हजार रुपैयाँ माग गरेको भए पनि अर्थ मन्त्रालयबाट ६ अर्ब ७६ करोड ६६ लाख ९० हजार रुपैयाँको मात्र स्रोत सहमति प्राप्त भएको थियो । प्राप्त सहमति मध्ये हालसम्म ३ अर्ब ५४ करोड २८ लाख रुपैयाँ वास्तविक खर्च भइसकेको र भुक्तानी गर्न बाँकी दायित्वहरू समेत जोड्दा कुल खर्च ५ अर्ब ३७ करोड रुपैयाँ पुग्ने आयोगले जनाएको छ।
कसरी भयो खर्च कम?
निर्वाचन आयोगका अनुसार यसपटकको निर्वाचन विगतको तुलनामा मितव्ययी भएको दाबी गरेको छ।
आयोगका प्रवक्ता नारायणप्रसाद भट्टराईले प्रतिनिधि सभा निर्वाचनमा कुल ५ अर्ब ३७ करोड रुपैयाँ खर्च भएको जानकारी दिए । यो खर्चलाई विश्लेषण गर्दा प्रतिमतदाता औसत २८४ रुपैयाँ खर्च भएको देखिएको उनको भनाइ छ ।
निर्वाचनलाई मितव्ययी बनाउन आयोगले अपनाएका केही रणनीतिहरूले खर्च घटाउन मद्दत गरेको प्रवक्ता भट्टराईले बताए ।
आयोगले यसअघिका निर्वाचनमा खरिद गरिएका सामग्रीहरूलाई मर्मत गरी पुन: प्रयोग गर्ने नीति लिएकाले खर्च कम भएको जनाएको छ ।
निर्वाचन सामग्री खरिद गर्दा सरकारी स्वामित्वका संस्थाहरूसँग सिधै सम्झौता गरी खरिद गरिएको थियो, जसले गर्दा खर्च जोगिएको आयोगले जनाएको छ ।
वातावरणमैत्री निर्वाचन र मितव्ययिताका लागि यसपटक ‘रबर म्याट’ जस्ता सामग्री खरिद नगरिएको आयोगले जनाएको छ ।
कुल ५० प्रकारका निर्वाचन सामग्री मध्ये ३७ प्रकारका सामग्रीहरू जिल्ला तहबाटै खरिद गरिएको थियो भने १३ प्रकारका मुख्य सामग्री मात्र केन्द्रबाट खरिद वा छपाइ गरिएको आयोगले जनाएको छ ।
प्रतिनिधि सभाको कुल २७५ सिटमध्ये प्रत्यक्षतर्फ १६५ र समानुपातिकतर्फ ११० जना निर्वाचित भएका छन्। निर्वाचित सदस्यहरूमा १७९ पुरुष (६५.०९%) र ९६ महिला (३४.९१%) रहेका छन्।
कुल १ करोड ८९ लाख ३ हजार ३८९ मतदाता कायम भएकोमा प्रत्यक्षतर्फ ९४.५५ प्रतिशत र समानुपातिकतर्फ ९६.०५ प्रतिशत मत सदर भएको छ। समग्रमा ४.७ प्रतिशत मत बदर भएको आयोगले जनाएको छ।
निर्वाचन आयोगले आजै राष्ट्रपति रामचन्द्र पौडेलसमक्ष निर्वाचनको अन्तिम परिणाम सहितको प्रतिवेदन पेश गरेको छ ।
प्रतिक्रिया