काठमाडौं । फागुन २१ गते भएको प्रतिनिधि सभा निर्वाचन अन्तर्गत जारी मतगणनामा राष्ट्रिय स्वतन्त्र पार्टी (रास्वपा) ले देशभर प्रभावशाली प्रदर्शन गरिरहेको छ ।
आज बिहान १२:२० बजेसम्मको नतिजा अनुसार रास्वपाले काठमाडौँ क्षेत्र नं. १ मा आफ्नो पहिलो जित दर्ता गरेको छ भने ५६ वटा निर्वाचन क्षेत्रमा अग्रता कायम राखेको छ ।
काठमाडौं क्षेत्र नं. १ बाट रास्वपाकी उम्मेदवार रञ्जु न्यौपाने १५,४५५ मत प्राप्त गर्दै निर्वाचित भएकी हुन् ।
बागमती प्रदेशमा रास्वपाले १७ क्षेत्रमा अग्रता बनाएको छ ।
बागमतीमा रास्वपा सबैभन्दा बलियो देखिएको छ । काठमाडौँ-८ मा विराज भक्त श्रेष्ठ (१४,७५०), काठमाडौँ-५ मा सम्सित पोखरेल (११,४३३) र चितवन-२ मा रवि लामिछाने (८,०१५) मतका साथ अगाडि छन् । त्यस्तै ललितपुर-३ मा डा. तोसिमा कार्की (६,९७२) मतसहित अग्रस्थानमा छिन् ।
लुम्बिनी प्रदेशमा ११ क्षेत्रमा रास्वपाले अग्रता बनाएको छ । लुम्बिनीमा ११ स्थानमा रास्वपाको अग्रता छ । जसमा रुपन्देही-२ मा सुलभ खरेल (१०,९१९) र बाँके-१ मा सुरेश कुमार चौधरी (६,८९९) मतका साथ अगाडि छन् ।
कोशी र मधेश प्रदेश ९/९ क्षेत्रमा रास्वपाले अग्रता बनाएको छ । कोशी प्रदेशमा मोरङ र झापाका विभिन्न क्षेत्रसहित ९ स्थानमा अग्रता छ । मधेश प्रदेशमा पनि धनुषा-३ मा मनिस झा (१४,१८९) को फराकिलो अग्रतासहित कुल ९ स्थानमा रास्वपा अगाडि छ।
गण्डकी र सुदूरपश्चिम: गण्डकीमा कास्की र तनहुँसहित ६ स्थानमा र सुदूरपश्चिममा कैलाली र कञ्चनपुरसहित ४ स्थानमा रास्वपाका उम्मेदवारहरूले अग्रता लिइरहेका छन् ।
पछिल्लो अपडेट अनुसार कर्णाली प्रदेशका कुनै पनि निर्वाचन क्षेत्रमा रास्वपाले अग्रता लिन सकेको छैन ।
प्रतिक्रिया