२० देशका ५३ कलाकारहरू कीर्तिपुरको सम्पदा पदयात्रामा

काठमाडौं । नेपाल ट्याटु सम्मेलन २०२५ मा सहभागी हुन आएका २० विभिन्न देशका ५३ जना अन्तर्राष्ट्रिय ट्याटु
कलाकारहरूले बुधबार कीर्तिपुर सम्पदा पदयात्रामा सहभागी भएका छन् । उनीहरूले ऐतिहासिक
सहर कीर्तिपुरको समृद्ध सांस्कृतिक र वास्तुकलागत सम्पदामा आफूलाई डुबाएर अनुभव सँगालेका छन् ।

पदयात्राका सहभागीहरूलाई कीर्तिपुर सामुदायिक होमस्टेले हार्दिक स्वागत गरेको थियो, जसले यहाँको
विशिष्ट आतिथ्यभाव र समुदायमा आधारित पर्यटन अभ्यासलाई झल्काउँछ। यो पदयात्रा कीर्तिपुर स्वयंसेवक
समाजद्वारा संयोजन गरिएको हो ।

कीर्तिपुरको सांस्कृतिक पहिचानलाई प्रवर्द्धन गर्न नियमित रूपमा सम्पदा पदयात्राहरूको आयोजना हुँदै आएको छ। पदयात्रालाई कीर्तिपुर गाइड एसोसिएसनले सहयोग गरेको छ।

पदयात्राको क्रममा कलाकारहरूले चिलान्चो स्तूप र बाघ भैरव मन्दिर लगायतका ऐतिहासिक तथा धार्मिक
महत्त्व बोकेका सम्पदास्थलहरूको अवलोकन गरे। यस अवसरले उनीहरूलाई कीर्तिपुरको सांस्कृतिक,
आध्यात्मिक र ऐतिहासिक गहिराइ बुझ्न प्रेरित गर्‍यो। यो पदयात्रा केवल दृश्य अवलोकनमा सीमित नभई
नेपाली जीवनशैली र जीवित सम्पदासँग अन्तरक्रियाको माध्यम बनेकाे छ ।

कीर्तिपुर स्वयंसेवक समाजका अध्यक्ष सुधन सुवेदीले सबै सहभागी कलाकारहरू तथा नेपाल ट्याटु सम्मेलनका
आयोजकहरूलाई कीर्तिपुरलाई रोजेकोमा विशेष धन्यवाद ज्ञापन गरे। उनले ‘यस्तो अन्तर्राष्ट्रिय सांस्कृतिक
यात्राको पृष्ठभूमि बन्न पाएकोमा कीर्तिपुर गौरवान्वित छ’ भने ।

पदयात्रामा सहभागी कलाकारहरू अमेरिका, बेलायत, जर्मनी, अस्ट्रिया, अष्ट्रेलिया, भारत, सिंगापुर, इटाली,
इन्डोनेसिया, कम्बोडिया, फ्रान्स, कोस्टारिका, स्पेन, चीन, टर्की, हङकङ, युक्रेन, अर्जेन्टिना, क्यानडा र
नेपालबाट आएका थिए, जसले सम्मेलनलाई साँच्चिकै अन्तर्राष्ट्रिय कला र संस्कृतिको उत्सवमा परिणत बनाएको
छ।

नेपाल ट्याटु सम्मेलन २०२५ आगामी अप्रिल ११ देखि १३ सम्म ललितपुरको सानेपा हेरिटेज गार्डेनमा
आयोजना हुँदैछ। कला, संस्कृति र पर्यटनको समन्वयमार्फत नेपाललाई विश्वसामु प्रस्तुत गर्न नेपाल पर्यटन
बोर्डले उक्त कार्यक्रमको सक्रिय प्रवर्द्धन गरिरहेको छ।