कुलमान र हितेन्द्रको रिट कुमार चुडाल र नित्यानन्द पाण्डेयको इजलासमा

काठमाडौं । नेपाल विद्युत प्राधिकरणबाट बर्खास्त गरिएका कुलमान घिसिङ र नवनियुक्त प्रबन्ध निर्देशक हितेन्द्रदेव शाक्यको  शाक्यले गरेका रिट न्यायाधीशद्वय कुमार चुडाल र नित्यानन्द पाण्डेयको इजलासमा परेको छ ।

मंगलबार सर्वोच्च अदालतको दैनिक पेसी सूचीको पहिलो नम्बरमा कुलमान र दोस्रोमा हितेन्द्रको निवेदन परेका छन् ।

आइतबार सर्वोच्चका प्रधानन्यायधिश प्रकाशमान सिंह राउत र न्यायाधीश शारङ्गा सुवेदीको सयुक्त इजलासले दुवैको मुद्दा हेर्न नभ्याइनेमा राखेको थियो ।

विद्युत प्राधिकरणको प्रबन्ध निर्देशकबाट गैर कानुनी रुपमा हटाएको भन्दै बिहिबार घिसिङले सर्वोच्चमा रिट दायर गरेका  थिए  ।

सरकारले ४ वर्ष अगाडिको कुलमानलाई नियुक्त गरेर आफूलाई हटाएको मुद्दा टुंगो नलाग्दै सरकारले आफूलाई पुनः विद्युत प्राधिकरणको प्रबन्ध निर्देशकको जिम्मेवारी दिएकोले शाक्यले पुरानो मुद्दा टुंगाइदिन भन्दै विहीबार सर्वोच्च अदालतमा निवेदन दिएका हुन् ।

शुक्रबार सर्वोच्चका न्यायाधीश अब्दुल अजीज मुसलमानको इजलासमा पेसी चढेको मुद्दामा सुनुवाई गर्दै न्यायाधीश मुसलमानले अन्तरिम आदेश दिएनन् भने आइतबार दुबै पक्षलाई बोलाउने आदेश गरेका थिए ।

अघिल्लो सोमबार बसेको मन्त्रिपरिषद्को बैठकले कुलमान घिसिङलाई बर्खास्त गरेर हितेन्द्र देव शाक्यलाई प्राधिकरणमा प्रबन्ध निर्देशकको जिम्मेवारी दिएको हो ।