तीनकुनेमा ३ राउण्ड हवाई फायर

काठमाडौं । काठमाडौंको तीनकुने क्षेत्रमा तनावग्रस्त भएपछि प्रहरीले तीन राउण्ड हवाई फायर गरेको छ ।

घरमा लागेको आगो निभाउन गएका दमकललाई प्रदर्शनकारीहरूले ढुंगा प्रहार गरेपछि प्रहरीले सुरुमा अश्रुग्यास प्रहार गरेको थियो । स्थिति नियन्त्रणमा नआएपछि प्रहरीले हवाई फायर गरेको हो । आगो निभाउन नसकी दमकल पनि घटनास्थलबाट फर्किएको छ ।

तीनकुनेमा राजसंस्था पुनर्स्थापनाको माग गर्दै राजावादी समूहले सभा आयोजना गरेका थिए । तर, प्रदर्शनका क्रममा सुरक्षाकर्मी र प्रदर्शनकारीबीच धकेलाधकेल भएपछि अवस्था तनावग्रस्त बनेको थियो ।

स्थिति नियन्त्रणमा लिन प्रहरीले अश्रुग्यास प्रहार गर्दै भिडलाई तितरबितर पारेको थियो । आन्दोलनकारीले कयौं घरमा तोडफोड र आगजनीको घटना भएपछि तनाव झन् बढेको छ ।