अहिलेसम्म न कुलमानले बर्खास्तीको चिठी पाए, न हितेन्द्रले नियुक्तिको !

काठमाडौं । सोमबारको मन्त्रिपरिषद्‍ बैठकले नेपाल विद्युत प्राधिकरणका प्रबन्ध निर्देशक कुलमान घिसिङलाई बर्खास्त गर्दै हितेन्द्र देव शाक्यलाई नियुक्त गर्ने निर्णय गर्‍यो ।

आइतबार बिहान कार्यालय खुलेपछि कुलमान बर्खास्तीको र हितेन्द्र नियुक्तिको पत्र कुरेर बसे । तर यो समाचार तयार पार्दासम्म दुबैले सरकारबाट औपचारिक पत्र पाएका छैनन् ।

मन्त्रिपरिषद् बैठकले निर्णय गरे पनि मुख्य सचिवले प्रमाणीकरण नगरिसकेका कारण शाक्यले नियुक्ति र घिसिङले बर्खास्तीको पत्र बुझ्न पाएका छैनन् । जसका कारण मंगलबार शाक्यले पदबहाली गर्न पाएनन् भने अदालत जाने तयारीमा रहेका घिसिङसमेत बर्खास्तीको पत्र नआएका कारण अलमलमा छन् ।

ऊर्जा, जलस्रोत तथा सिंचाई मन्त्रालयका सचिव सुरेश आचार्यले मन्त्रिपरिषद्को निर्णय नआइसकेकाले नियुक्तिपत्र दिन बाँकी रहेको बताए । ‘मन्त्रिपरिषदबाट लिखित निर्णय आएको छैन । आउने बित्तिकै हामी नियुक्ति पत्र दिन्छौं,’ उनले भने, ‘आउँदै होला कि ?’

लोकप्रियताको आडमा सरकारलाई चुनौती दिएपछि हटाइए कुलमान

साउन २४ गते दोस्रो कार्यकाल पूरा हुन लागेका घिसिङ बर्खास्तीमा परेका हुन् । उनी बर्खास्तीमा परेपछि पद थमौतीको अन्तरिम आदेश माग गर्दै अदालत जाने तयारीमा छन् । उनले यस विषयमा कानुनी परामर्श समेत गरिसकेको स्रोतको दाबी छ।

यता शाक्य दिउँसै प्राधिकरणमा पदबहालीका लागि जाने तयारीमा थिए तर नियुक्तिपत्र नआएकाले रोकिएका छन् ।

पहिलो कार्यकालमा केहि महिना मात्रै काम गर्न शाक्यले पाएका थिए । सरकारले २०७८ साउन २५ गते उनलाई ऊर्जा मन्त्रालय सरुवा गरेर कुलमान घिसिङलाई प्राधिकरणको जिम्मा दिइएको थियो । त्यसपछि सरकारको उक्त निर्णय विरुद्ध अदालत गएका थिए । उनको मुद्धामा कुनै निर्णय नभई पदावधि सकियो ।

ऊर्जा मन्त्रालय र कुलमानबीच विवाद चर्किएपछि उनी प्रबन्ध निर्देशक बन्न लागि परेका थिए । घिसिङलाई हटाउने संकेत पाएपछि उनी दौडधुपमा थिए । प्रधानमन्त्री केपी शर्मा ओली निकट उनी ४ वर्षका लागि प्राधिकरणको जिम्मेवारीमा जान लागेका हुन् ।

प्राविधिक रुपमा अब्बल शाक्य व्यवस्थापनमा भने कमजोर रहेको प्राधिकरणभित्र टिप्पणी हुने गरेको छ ।

विद्युत प्राधिकरणको प्रबन्ध निर्देशकमा दोस्रो पटक नियुक्त भएका शाक्य को हुन् ?

कुलमानको बर्खास्तीपछि मंगलबार दिनभर जसो काठमाडौंमा बिरोध प्रदर्शन भइरहेका छन् । प्रमुख प्रतिपक्षी नेकपा माओवादी केन्द्रसहित स्वतन्त्र नागरिकको समूहले माइतीघर र बानेश्वरमा प्रदर्शन गरेका छन् । त्यसक्रममा घिसिङ समर्थक र प्रहरीबीच धकेलाधकेलसमेत भएको छ । त्यस्तै सिंहदरबारमा कुलमानको पक्षमा प्रदर्शनमा उत्रिएका नेकपा बहुमतका नेता कार्यकर्तालाई प्रहरीले नियन्त्रणमा लिएको छ ।