सरकारमा गएको ८ महिनासम्म काम गर्न नसकेको सञ्चारमन्त्री गुरुङको स्वीकारोक्ति

काठमाडौं । सञ्चार तथा सूचना प्रविधि मन्त्री पृथ्वीसुब्बा गुरुङले ८ महिनासम्म कुनै काम नै गर्न नसकेको स्वीकार गरेका छन् ।

बुधबार नेपाल आर्थिक पत्रकार समाज (सेजन)ले राजधानीमा आयोजना गरेको ‘रिभलाइजिङ द टेलिकम इन्डस्ट्री’ नामक कार्यक्रलाई सम्बोधन गर्ने क्रममा मन्त्री गुरुङले आफू असारमा मन्त्री भएर सञ्चार मन्त्रालय प्रवेश गरेको र त्यसपछि फागुन अन्तसम्म आइपुग्दा पनि कुनै प्रभावकारी काम गर्न नसकेको भन्दै सार्वजनिक कार्यक्रममै स्वीकारेका छन् ।

मन्त्री गुरुङले सञ्चार क्षेत्रको विकासका लागि आफूले केही काम गर्न खोजेको भए पनि प्रभावकारी र देखिने केही काम नै गर्न नसकेको बताए । उनले भने ‘८ महिनासम्म सिन्को भाँचेको छैन त भन्दिन तर पनि सन्तोषजनक काम गर्न सकेको छैन ।’

उनले काम गर्न नसकेको र काम गर्न नदिनेको विषयमा भने स्पष्ट पार्न चाहेनन्।