फाइनलमा पुग्न जनकपुर र कर्णाली भिड्दै

काठमाडौं । जनकपुर बोल्ट्स र कर्णाली याक्सले नेपाल प्रिमियर लिग (एनपिएल) अन्तर्गत बिहीबार क्वालिफायर २ मा प्रस्पिर्धा गर्दैछन् ।

कीर्तिपुरस्थित त्रिवि क्रिकेट मैदानमा हुने खेल दिउँसो १२:३० बजे सुरु हुनेछ । पहिलो क्वालिफायरमा सुदूरपश्चिमसँग पराजित भएको जनकपुरले इलिमिनेटरमा विजयी भएको टोलीसँग खेल्न लागेको हो ।

लिग चरणको खेलमा जनकपुरले कर्णालीमाथि ८ विकेटको जित निकालेको थियो । त्यसैले आजको खेलमा जनकपुरलाई केही सहज हुने पनि देखिन्छ ।

यस खेलको विजेताले शनिबार उपाधिका लागि सुदूरपश्चिम रोयल्सको सामना गर्नेछ। जनकपुरले क्वालिफायर १ मा सुदूरपश्चिमसँग ८ विकेटले पराजित भएको थियो ।

कर्णाली प्रतियोगितामा ७ खेलबाट ४ खेलमा जित निकाल्दै नेट रनरेटको आधारमा काठमाडौं गुर्खाजलाई पछि पार्दै शीर्ष चारमा स्थान बनाएको थियो ।

कर्णाली याक्सले इलिमिनेटरमा चितवन राइनोजलाई २१ रनले हराउँदै क्वालिफायर २ मा स्थान बनाएको हो । सोमपाल कामीको कप्तानीमा कर्णाली मैदानमा उत्रदा आसिफ शेखको कप्तानीमा जनकपुर मैदान उत्रनेछ ।