एनपीएलको पुरस्कार घोषणा: विजेताले १ करोड १० लाख पाउने, चौथोले १५ लाख

काठमाडौं । नेपाल क्रिकेट संघ (क्यान) ले नेपाल प्रिमियर लिग (एनपीएल) का पुरस्कार राशी घोषणा गरेको छ । मंगलबार जारी गरिएको विज्ञप्तिमा विजेता, उपविजेता र अन्य स्थानका पुरस्कार विवरण सार्वजनिक गरिएको हो ।

क्यानका अनुसार विजेता टोलीले १ करोड १० लाख रुपैयाँ पुरस्कार प्राप्त गर्नेछ । उपविजेता टोलीले ५१ लाख, तेस्रो स्थानमा रहने टोलीले २५ लाख र चौथो स्थानमा रहने टोलीले १५ लाख रुपैयाँ पुरस्कार पाउनेछ ।

यसअघि नै प्रतियोगिताका उत्कृष्ट नेपाली खेलाडीलाई कार पुरस्कार दिने घोषणा गरिएको थियो ।

बुधबारबाट एनपीएलको प्लेअफ खेलहरू सुरु हुँदैछन् । शीर्ष चार टोली सुदूरपश्चिम रोयल्स, जनकपुर बोल्ट्स, चितवन राइनोज र कर्णाली याक्स प्लेअफमा प्रवेश गरिसकेका छन् ।