महासंघमा अन्जन श्रेष्ठपछिको अध्यक्ष प्रत्यक्ष निर्वाचित हुने, कार्यकाल २ वर्षमात्र

काठमाडौं । नेपाल उद्योग वाणिज्य महासंघको विधान संशोधन भएको छ । मंगलबार बसेको विशेष साधारणसभाले अध्यक्षको चयन प्रत्यक्ष निर्वाचनबाट हुने गरी विधान संशोधन भएको हो ।

नयाँ व्यवस्थाअनुसार हालका वरिष्ठ उपाध्यक्ष अन्जन श्रेष्ठ अध्यक्ष स्वतः अध्यक्ष भएपछिबाट अध्यक्षको प्रत्यक्ष निर्वाचन हुनेछ ।

यता अध्यक्षको कार्यकाल पनि २ वर्षको लागि हुने भएको छ । हाल महासंघको अध्यक्ष ३ वर्ष नेतृत्व सम्हाल्ने गरेका छन् । वर्तमान वरिष्ठ उपाध्यक्ष अन्जन श्रेष्ठको अध्यक्षको कार्यकाल सकिएपछि २ वर्षे कार्यकाल लागू हुने गरी विधान संशोधन भएको हो ।

संशोधित विधानअनुसार महासंघमा महिला उपाध्यक्ष रहने व्यवस्था हुनेछ । महिला उपाध्यक्ष कार्यकारिणी समितिले चयन गर्नेछ तर कार्यकारिणी समितिमा १२ जना महिला सदस्य भएमा मात्र महिला उपाध्यक्ष चयन हुने गरी विधान संशोधन गरिएको छ ।

महासंघले एकजना वरिष्ठ उपाध्यक्ष रहने व्यवस्थालाई निरन्तरता दिएको छ । तर, वरिष्ठ उपाध्यक्ष भने निर्वाचनमार्फत् नभएर चयन कार्यकारिणी समितिले गर्नेछ । मंगलबारको विशेष साधारणसभाले जिल्ला/नगर तर्फ २ जना उपाध्यक्ष रहने गरी बिधान संशोधन गरेको छ ।

रामवाघ महल, भनिमण्डल, ललितपुरमा बसेको विशेष साधारणसभाले यस्तो व्यवस्था गरेको हो ।

२०८१ असार २४ गते बसेको नेपाल उद्योग वाणिज्य महासंघको कार्यसमिति बैठकले विधान संशोधनको प्रस्ताव विशेष साधारणसभामा लैजाने निर्णय गरेको थियो । सोहीअनुसार आजका लागि विशेष साधारणसभा बोलाइएको थियो ।

महासंघमा वर्षौंदेखि गिजोलिएको विधान संशोधनको एजेण्डा बल्ल पास भएको हो ।

२०७३ सालमा महासंघले वरिष्ठ उपाध्यक्षलाई स्वतः अध्यक्ष बनाउने गरि विधान संशोधन गरेको थियो । त्यही विधानअनुसार तत्कालीन वरिष्ठ उपाध्यक्ष भवानी राणा अध्यक्ष बनेकी थिइन् । त्यसयता विधान संशोधन हरेक अध्यक्षको एजेन्डा बन्दै आएको छ ।

महासंघको २०८० चैत २८ र २९ गतेक‍ो ५८ औं वार्षिक साधारणसभाले विधान संशोधनको प्रक्रिया अघि बढाउन निर्देशन दिएको थियो ।