काठमाडौंबाट पृथ्वी राजमार्ग हुँदै बाहिरिने गाडी पठाउने तयारी

काठमाडौं । धादिङको झ्याप्ले खोलामा पहिरोले अवरुद्ध सडक खुलेपछि पृथ्वी राजमार्गमा अलपत्र परेका एक हजार सात सय सवारीसाधन काठमाडौं उपत्यका भित्रिएका छन् ।

गृह मन्त्रालयका प्रवक्ता ऋषिराम तिवारीका अनुसार झ्याप्ले खोलामा पहिरोले अवरुद्ध सडक खुलेपछि सवारीसाधन काठमाडौं भित्रन थालेका हुन् ।

आजदेखि काठमाडौंबाट सो मार्ग हुँदै बाहिरिने सवारी साधन पठाउने तयारी भइरहेको उनले जानकारी दिए ।

‘आजदेखि काठमाडौं उपत्कायबाट पनि पृथ्वी राजमार्ग हुँदै सवारी साधन बाहिरने छन्’, उनले भने, ‘मुख्य राजमार्गका साथै अन्य अवरुद्ध सडक सञ्चालनका लागि गृह मन्त्रालयले अन्य निकायसँग समन्वय गरेर का गरिरहेको छ ।’

त्यस्तै बीपी राजमार्गमा अलपत्र परेका यात्रुको उद्धार आज साँजसम्म भइसक्ने उनको भनाइ छ ।

‘आज साझँसम्म काभ्रेपलाञ्चोकको बीपी राजमार्गअन्तर्गत रोशी खोलामा अलपत्र परेका सबै यात्रुहरुको उद्धार भइसक्छ’, उनले भने, ‘अहिले त्यहाँ नेपाली सेनासहित सुरक्षाकर्मीको टोली हवाई उद्धारदेखि डोरीको सहायताबाट समेत अलपत्र यात्रुहरुको उद्धार गरिरहेको छ ।’