रास्वपाको कार्यालयमा कार्यकर्ताको चहलपहल बढ्यो, प्रहरीको उपस्थिति बाक्लो

काठमाडौं । राष्ट्रिय स्वतन्त्र पार्टी(रास्वपा)ले कार्यकर्तालाई केन्द्रीय कार्यालयमा बोलाएसँगै कार्यकर्ताको उपस्थिति बढेको छ ।

पार्टी सभापति रवि लामिछानेलाई प्रहरीले पक्राउ गर्ने तयारी गरिरहँदा रास्वपाले उपत्यकाका पार्टी सदस्यहरुलाई केन्द्रीय कार्यालयमा आउन भनेको हो ।

रास्वपा बागमती प्रदेशका सभापति डा. अच्युत्तम लामिछानेले कार्यालयमा उपस्थित हुन आग्रह गरेका स्रोतको भनाइ छ।

सभापति रवि लामिछाने सहित केन्द्रीय नेताहरु पार्टी कार्यालय बनस्थलीमा छन् ।

बनस्थलीस्थित रास्वपाको घण्टीघरमा कार्यकर्ताको चहलपहल बढेको हो भने प्रहरीको उपस्थिति पनि बाक्लिएको छ । सादा पोशाकका प्रहरी पनि कार्यालयमा परिचालन भएका छन् ।

सहकारी ठगी प्रकरणमा संसदीय छानबिन समितिले रास्वपा सभापति लगायतलाई कारबाही सिफारिस गरेपछि गोर्खा मिडियाका प्रबन्ध निर्देशक रवि लामिछानेलाई पक्राउ पर्ने आशंका गर्दै रास्वपाले कार्यकर्ता बोलाएको हो ।