एजेन्सी । बलिउड सेलिब्रिटीहरूले कक्रोच जनता पार्टी (सीजेपी) आन्दोलनका बारेमा खुलेर बोल्न थालेका छन् ।
पछिल्लोपटक आलिया भट्ट, आर. माधवन र कमल हासनले विद्यार्थीहरूका लागि हृदयस्पर्शी सन्देश साझा गरेका छन् । विभिन्न क्षेत्रका धेरै कलाकारहरूले युवाहरूले उठाएका सरोकारहरूलाई स्वीकार गर्दै न्याय, जवाफदेहिता र संवादको आह्वान गर्न सामाजिक सञ्जालको प्रयोग गरेका छन् ।
बलिउड अभिनेत्री आलिया भट्टले इन्स्टाग्राममा एक भावनात्मक टिप्पणी साझा गर्दै विगत केही दिनका घटनाहरूले आफ्नो ‘हृदय रोएको’ तर ‘आशाले भरिएको’ बताएकी छन् । आफ्नो विश्वासका लागि लडिरहेका प्रत्येक विद्यार्थीले आफूलाई मात्र नभई ठूलो अर्थ बोकेको उनले बताइन् ।
उनले लेखेकी छन्, ‘आफ्नो अडानमा अडिग प्रत्येक विद्यार्थीको पछाडि एउटा सपना, परिवारको आशा र अनगिन्ती त्यागको यात्रा लुकेको छ ।’ विद्यार्थीहरूले आफूलाई साथ दिनेहरूको आशा बोकेका हुन्छन् र आउने पुस्ताका लागि राम्रो भविष्य निर्माण गर्न मद्दत गरिरहेको आलियाले थपिन् ।
आर. माधवनको भनाइ उनीमाथि फिल्म एन्ड टेलिभिजन इन्स्टिच्युट अफ इन्डियाका विद्यार्थीहरूले गरेको व्यंग्यको एक दिनपछि आएको हो । एफटीआईआईका अध्यक्ष समेत रहेका माधवन कथित नीट प्रश्नपत्र चुहावट र सीजेपी नेतृत्वको आन्दोलनमा मौन बसेको भन्दै विद्यार्थीहरूले उनको आलोचना गरेका थिए ।
उनको कार्यकक्षको ढोकामा ‘गायब’ मिम र ‘नीट बिक्रीमा छ’ लेखिएको पोस्टर टाँसिएका तस्बिरहरू भाइरल भएका थिए । त्यसको लगत्तै अभिनेताले आफ्नो मौनता तोड्दै विद्यार्थीहरूप्रति एक्यबद्धता जनाए र निष्पक्ष एवं पारदर्शी शिक्षा प्रणालीको महत्त्वमा जोड दिए ।
आफ्नो विज्ञप्तिमा माधवनले भने, ‘शिक्षासँग हाम्रो राष्ट्रको भविष्य निर्माण गर्ने शक्ति छ र प्रत्येक विद्यार्थीले योग्यतामा आधारित निष्पक्ष र पारदर्शी प्रणाली पाउनुपर्छ ।’
उनले परीक्षामा भएको अनियमितताका लागि जिम्मेवारहरूलाई कानुनी कठघरामा ल्याउन सरकारलाई आग्रह गर्दै सुधारात्मक कदम चालिनेमा विश्वास व्यक्त गरे । विद्यार्थीहरूलाई प्रत्यक्ष सम्बोधन गर्दै उनले थपे, ‘कृपया विश्वास नगुमाउनुहोस् । तपाईंको प्रतिभा, लगनशीलता र चरित्र कुनै पनि प्रणालीको कमजोरी भन्दा धेरै ठूलो छ । कडा परिश्रम गर्न नछोड्नुहोस्, आफूमाथि विश्वास गर्नुहोस्, र अस्थायी अवरोधहरूले तपाईंको भविष्य निर्धारण गर्न नदिनुहोस् ।’
दिग्गज अभिनेता कमल हासनले पनि कडा शब्दमा आफ्नो धारणा साझा गर्दै संकट यति ठूलो हुनु अगाडि नै पहिलो बच्चाले चिन्ता उठाउँदा देशले कदम चाल्नुपर्थ्यो भनेका छन् । उनले शिक्षा प्रणालीको आलोचना गर्दै सिकाइको ठाउँ कोचिङले, उत्सुकताको ठाउँ चिन्ताले र योग्यताको ठाउँ आपराधिकताले लिएको छ भने ।
बालबालिकाहरूले जवाफको सट्टा ब्यारिकेड र लाठीको सामना गर्नुपर्दा राष्ट्र असफल हुन्छ, हासनले भने । उनले सोनम वाङचुकलाई अनशन तोड्न पनि अपिल गरे । विद्यार्थीहरूलाई सम्बोधन गर्दै उनले लेखे, ‘तपाईंहरू हामीमध्येका उत्कृष्ट हुनुहुन्छ । तपाईंहरूले आफ्नो कर्तव्य पूरा गर्नुभएको छ । अब देशले तपाईंहरूको लागि आफ्नो कर्तव्य पूरा गर्ने समय आएको छ ।’
अन्य धेरै सार्वजनिक व्यक्तित्वहरूले पनि विद्यार्थीहरूलाई समर्थन गरेका छन् । गायक अरिजीत सिंहले प्रदर्शनकारीहरू विरुद्ध भएको बल प्रयोगको कडा आलोचना गरे । उनले विद्यार्थीहरूलाई किन कुटपिट भइरहेको छ भन्दै प्रश्न गरे र मानिसहरूले यी घटनाहरू सम्झिरहने बताए ।
एक प्रयोगकर्ताले उनको टिप्पणीका कारण आफूले उनीप्रतिको सम्मान गुमाएको दाबी गरेपछि अरिजीतले शान्तपूर्वक जवाफ दिए । उनले सबैको रायको सम्मान गर्ने र आफ्नो शब्दले कसैलाई चोट पुर्याएको भए माफी माग्ने बताए तर आफ्नो अडान परिवर्तन नहुने स्पष्ट पारे ।
अभिनेत्री वाणी कपुरले यस आन्दोलनभरि आफ्नो मन युवाहरूसँगै रहेको र उनीहरूलाई सहानुभूति, बुझाइ र सुन्ने इच्छाका साथ व्यवहार गरिने आशा व्यक्त गरिन् ।
अभिनेता इमरान खान मुम्बईमा भएको विरोध प्रदर्शनमा विद्यार्थीहरूसँगै सामेल भए भने फिल्म निर्माता छाया कदमले युवा पुस्ताको साथमा उभिनुलाई आफ्नो नैतिक कर्तव्य भनिन् ।
स्ट्यान्ड–अप कमेडियन समय रैनाले अर्थपूर्ण संवाद किन चाँडो हुन सकेन भन्दै प्रश्न गरे र विद्यार्थीहरूले केवल राम्रो शिक्षा प्रणाली र जवाफदेहिता मागिरहेको बताए । उनले उनीहरूको आवाज सुनिने र ठोस कदम चालिने आशा व्यक्त गरे ।
जति सीजेपी आन्दोलन अगाडि बढ्दै छ, चलचित्र उद्योगका थप आवाजहरू यस बहसका पक्षमा थपिँदै गएका छन् । सलमान खानले पनि विद्यार्थीहरूप्रति एक्यबद्धता प्रकट गरेका छन् ।
प्रतिक्रिया