भक्तपुरका अधिकांश व्यवसाय मापदण्डविपरीत सञ्चालन

भक्तपुर । भक्तपुर नगरपालिकाको सल्लाघारीदेखि सूर्यविनायक घलाँतेसम्मका अधिकांश पसल एवं व्यवसाय वर्षौंदेखि दर्ताबिना सञ्चालनमा रहेको पाइएको छ ।

भक्तपुर नगरपालिका अनुगमन समितिले आज ३५ पसल तथा व्यवसायमा गरेको अनुगमनका क्रममा सल्लाघारी, चुनदेवी र घलाँतेसम्मका ३५ वटा पसलमध्ये अधिकांश पसल दर्ताबिना नै सञ्चालन गरेको पाइएको हो ।

अनुगमनमा मोतिलाल दुगडको दुगड वर्ड्स एण्ड सन्स् प्रालि, ब्रदर्श रिकण्डिसन (ब्रो इन्टर प्राइजेज), सोलु खाजा घर, सूर्य गणेश इन्टरप्राइजेज, धमाका सेल, भक्तपुर ग्लास हाउस, एबिआर हार्डवेयर, शङ्कर इञ्जिनियरिङ आइरन वर्कशप, मारुती नन्दन सप्लायर्स, विविध सप्लायर्स दर्ता नै नभई सञ्चालनमा रहेको पाइएको हो ।

राम भोले ड्राईभिङ स्कूल प्रालि, न्यू सागर मोटर साइकल वर्कसप, स्पेशल चिया खाजा पसल, वि.ए.निर्माण सामग्री सप्लायर्स, नारायणी भोजनालय, हिडेन बाइक केयर सेन्टर मोटरसाइकल वर्कसप, फ्रेण्ड्स रिकण्डिसन हब, मुक्तिनाथ कार हाउस प्रालि, द व्हील्स प्रालि, एसडिआर टेक्नो एण्ड ट्रेड प्रालि पनि दर्ता विना नै सञ्चालनमा रहेको पाइएको छ ।

अनुगमनका क्रममा दोलखा भीमसेन सुन चाँदी पसल, फ्रेण्ड्स बाइकर्स, दास अटो लिंक, प्रखर इन्टरप्राइजेज, स्टाण्डर खाजा घर, जैसवाल बाथ एण्ड सेनेटरी वयर पनि दर्ता नभई सञ्चालनमा रहेको पाइएको थियो ।

१० वर्षदेखि बिनादर्ता अवैध रूपमा सञ्चालन भएका पसल एवं व्यवसाय र सात वर्षदेखि नवीकरण नगरेका व्यवसायलाई तीन दिनभित्र नगरपालिकामा आएर दर्ता गर्न निर्देशन दिइएको बजार निरीक्षक रामकृष्ण प्रजापतिले जानकारी दिए ।