अब बैंकहरुले १० प्रतिशतभन्दा बढी कल डिपोजिट राख्न नपाउने, राष्ट्र बैंकले जारी गर्यो यस्तो निर्देशन

काठमाडौं । अब बैंकहरुले कूल निक्षेपको १० प्रतिशत मात्रै कल निक्षेप लिन पाउने भएका छन् । नियामक नेपाल राष्ट्र बैंकले निर्देशन जारी गर्दै बाणिज्य बैंकहरुका लागि कल निक्षेपको सीमा १० प्रतिशत तोकेको हो ।

२०७७ असारभित्र बैंकहरुले कल डिपोजिटको मात्रा १० प्रतिशतमा झार्नुपर्ने

विकास बैंक र फाइनान्स कम्पनीहरुले भने १५ प्रतिशतसम्म कल डिपोजिट लिन पाउने राष्ट्र बैंकको निर्देशनमा उल्लेख छ ।

यसअघि १० प्रतिशतभन्दा बढी कल डिपोजिट भएका बैंकहरुले ०७७ असार मसान्तभित्रमा राष्ट्र बैंकले तोकेको सीमाभित्र ल्याउनुपर्ने छ ।

अहिले दर्जन वाणिज्य बैंकको कल निक्षेप १० प्रतिशतभन्दा माथि छ ।

कल निक्षेपमा १० प्रतिशतको सीमा, प्राइमलाई सबैभन्दा बढी समस्या, कुन बैंकको कति ?

‘कुनै बैंकको कल डिपोजिटको हिस्सा २० प्रतिशत छ भने एकैदिन त्यो पैसा निस्कन पनि सक्छ, यदि १० प्रतिशत रकम मात्रै निस्कने हो भने पनि त्यो बैंकले दिन सक्दैन,’ राष्ट्र बैंकका एक अधिकारीले क्लिकमाण्डूसँग भने ‘बैंकमा राखेको पैसा बैंकले दिन सकेन भने समग्र बैंकिङ प्रणालीको विश्वसनीयतामाथि नै प्रश्न उठ्ने भएकाले सीमा तोकिएको हो ।’

साना बैंकप्रति झन् कठोर बन्यो राष्ट्र बैंक, १०% भन्दा बढी कल डिपोजिट लिन नपाइने

शुरुमा राष्ट्र बैंकले कल डिपोजिटको सीमा ०७६ असार मसान्तसम्ममा १५ प्रतिशत र पुस मसान्तसम्ममा १० प्रतिशतमा झार्नुपर्ने गरी परिपत्र तयार पारेपनि बैंकहरुले उक्र समयमा झार्न नसक्ने भनेपछि ०७७ असार मसान्तसम्मको सीमा तोकिएको ती अधिकारीले जानकारी दिए ।

राष्ट्र बैंकको निर्देशन हेर्न यहाँ क्लिक गर्नुहोस्

पुस मसान्तसम्मको तथ्यांक अनुसार वाणिज्य बैंकसँग २६ खर्ब ५६ अर्ब रुपैयाँको निक्षेप थियो । जसमा कल डिपोजिट अन्तर्गत बैंकहरुमा २ खर्ब ८४ अर्ब रुपैयाँ थियो । जसअनुसार औसतमा वाणिज्य बैंकहरुसँग कल निक्षेपमा १०।७१ प्रतिशत रकम थियो ।

पुस मसान्तको तथ्यांक