जति बढी कल डिपोजिट उति बढी समस्या, कुन बैंकको कल डिपोजिट कति ?

काठमाडौं । कल डिपोजिटका कारण समस्या उत्पन्न हुँदा वाणिज्य बैंकहरुको छाता संगठन नेपाल बैंकर्स संघले ब्याजदरमा गरेको भद्र सहमति तोडिएको छ ।

कल डिपोजिटको मात्रा धेरै भएका कारण ऋणयोग्य पुँजी अभाव (तरलता) को चाप थेग्न नसकेर केही बैंकहरुले बैंकर्स संघको भद्र सहमति तोडेका थिए ।

भद्र सहमति तोडिएसँगै व्यक्तिगत मुद्दति निक्षेपमा बैंकहरुले आफूखुसी ब्याज दिन थालिसकेका छन् । धरै कल डिपोजिट उठाउने बैंकहरु समस्यामा परेका कारण बैंकिङ प्रणालीमै समस्या जटिल बन्दै गएको बैंकरहरु बताउँछन् ।

‘ठूला बैंकको बचत खातामा रहेको पैसा तान्न साना बैंकले कल डिपोटिज बढाएका छन्, जसकारण बैंकहरुमा बढी समस्या देखियो,’ एक बैंकरले भने ।

ती बैंकरका अनुसार जुन बैंकले कल डिपोजिटको मात्रा बढाउँछ त्यो बैंक जोखिममा हुन्छ । किनभने कल डिपोजिटमा रहेको निक्षेप जुनसुकै बेला पनि बाहिरिने भएकाले त्यसलाई आधार मानेर ऋण दिँदा बैंकहरु समस्या फस्ने गरेका हुन् ।

‘सामान्ययता कूल निक्षेपमा १० देखि १५ प्रतिशतसम्म कल डिपोजिटको हिस्सा हुनु ठीकै हो । तर, २० प्रतिशत माथि कल डिपोजिटको हिस्सा हुनु भनेको त्यो बैंक जोखिममा छ भन्ने संकेत हो,’ ती बैंकरले भने ।

कल डिपोजिटले समस्या थप बढाएपछि नियामक राष्ट्र बैंकले पनि बैंकहरुको कल डिपोजिटमा आँखा लगाएको छ ।

पछिल्लो तथ्यांक अनुसार कूल निक्षेपमा आधा दर्जन बैंकको कल डिपोजिटको हिस्सा २० प्रतिशत भन्दा बढी छ । प्राइम, सेञ्चुरी, कुमारी सिभिल, एनसीसी र सिद्दार्थ बैंकमा कल डिपोजिटको हिस्सा २० प्रतिशतभन्दा बढी छ । सबैभन्दा बढी कल डिपोजिटको हिस्सा राख्ने बैंक प्राइम बैंक हो भने राष्ट्रिय वाणिज्य बैंक सबैभन्दा कम कल डिपोजिटको हिस्सा राख्ने बैंक हो ।