एजेन्सी । अमेरिकाका संघीय अधिकारीहरूका अनुसार, ह्वाइट हाउसको सुरक्षा चेकपोइन्ट नजिक पुगेर अधिकारीहरूमाथि गोली चलाउने एक बन्दुकधारीको सुरक्षाकर्मीको जवाफी कारबाहीमा मृत्यु भएको छ ।
राष्ट्रपति डोनल्ड ट्रम्प उपस्थित रहेको ह्वाइट हाउसमा शनिबार केही समयका लागि लकडाउन गरिएको थियो । लगातार गोली चलेको आवाज आएपछि त्यस क्षेत्रमा रहेका पत्रकारहरू ज्यान जोगाउन यताउता भागेका थिए ।
गोलीबारीका क्रममा एक बटुवालाई पनि गोली लागेको छ । सिक्रेट सर्भिसले भन्यो, ‘ती बटुवालाई बन्दूकधारीको सुरुवाती गोली लागेको हो वा त्यसपछिको दोहोरो भिडन्तका क्रममा लागेको हो भन्ने कुरा अझै स्पष्ट हुन सकेको छैन ।’
अधिकारीहरूका अनुसार, दोहोरो गोली हानाहानमा सिक्रेट सर्भिसका कुनै पनि कर्मचारी घाइते भएनन् र राष्ट्रपति यस घटनाबाट प्रभावित भएनन् ।
केही घण्टापछि ट्रम्पले एक सामाजिक सञ्जाल पोस्ट मार्फत सुरक्षा निकायको छिटो र व्यावसायिक कारबाहीको प्रशंसा गरे ।
उनले वाशिङटनको एक होटलमा भएको ह्वाइट हाउस करेस्पोन्डेन्ट्स एसोसिएसनको रात्रिभोजमा गोली चलेको एक महिनापछि यो घटना भएको उल्लेख गरे । यसले भविष्यका सबै राष्ट्रपतिहरूका लागि वाशिङटन डीसीमा अहिलेसम्मकै सबैभन्दा सुरक्षित ठाउँ बनाउनु कति महत्त्वपूर्ण छ भन्ने देखाउँछ जुन सम्भवतः उनको समारोह हल निर्माण गर्ने योजना तर्फको संकेत थियो भनी उनले थपे ।
आरोपितको आधिकारिक नाम सार्वजनिक गरिएको छैन तर धेरै अमेरिकी सञ्चारमाध्यमहरूले उनको मानसिक स्वास्थ्य समस्याको इतिहास रहेको रिपोर्ट गरेका छन् ।
उनी गत वर्ष ह्वाइट हाउसको अर्को चेकपोइन्टबाट अनधिकृत रूपमा प्रवेश गर्न खोज्दा पक्राउ परेका थिए र उनलाई नजिक नआउने आदेश जारी गरिएको थियो ।
अमेरिकी सिक्रेट सर्भिसका अनुसार, स्थानीय समय अनुसार साँझ ६ बजेपछि एक व्यक्ति १७औं स्ट्रिट र पेन्सिलभेनिया एभिन्यू नजिकैको ह्वाइट हाउसको गेटमा रहेको चेकपोइन्टमा पुगेर पेस्तोल निकालेर गोली चलाएका थिए । अमेरिकी राष्ट्रपति र उपराष्ट्रपतिको सुरक्षा गर्ने सिक्रेट सर्भिसका अधिकारीहरूले जवाफी कारबाही गरे जसका क्रममा संदिग्धलाई गोली लाग्यो । उनलाई नजिकैको अस्पताल लगिएकोमा पछि उनको मृत्यु भयो ।
एबीसी न्युजकी रिपोर्टर सेलिना वाङले सामाजिक सञ्जालमा एउटा भिडियो साझा गरेकी छन् । त्यसमा उनले इरानसँगको वार्ताका बारेमा रिपोर्टिङ गरिरहँदा गोली चलेको आवाज सुनिन्छ । भिडियोमा दर्जनौं गोली चलेको जस्तो आवाज आएपछि वाङ ज्यान जोगाउन निहुरिएको देख्न सकिन्छ ।
‘हामीलाई प्रेस ब्रिफिङ रुममा दौडेर जान भनियो, जहाँ हामी अहिले बसिरहेका छौं,’ वाङले थपिन् ।
एफबीआई निर्देशक काश पटेलले पोस्ट गरे, ‘एफबीआई घटनास्थलमा छ र ह्वाइट हाउस परिसर नजिकै चलेको गोलीको सम्बन्धमा सिक्रेट सर्भिसलाई सहयोग गरिरहेको छ । हामी सम्भव भएसम्म जनतालाई थप जानकारी गराउनेछौं ।’
ट्रम्प उपस्थित रहेको ह्वाइट हाउसमा शनिबार केही समयका लागि लकडाउन गरिएको थियो । लगातार गोली चलेको आवाज आएपछि त्यस क्षेत्रमा रहेका पत्रकारहरू ज्यान जोगाउन यताउता भागेका थिए ।
प्रतिक्रिया