कक्रोच जनता पार्टीका संस्थापकलाई आयो ज्यान मार्ने धम्की

एजेन्सी । भारतको कक्रोच जनता पार्टीका संस्थापक अभिजीत दिपकेले सामाजिक सञ्जालमा भाइरल भएको व्यंग्यात्मक राजनीतिक दल घोषणा गरेको केही दिनपछि शुक्रबार आफूलाई ह्वाट्सएपमा ज्यान मार्ने धम्की आएको दाबी गरेका छन् ।

सामाजिक सञ्जालमा आधारित कक्रोच जनता पार्टी (सीजेपी) सुरु गरेका दिपकेले एउटा अज्ञात नम्बरबाट आएको धम्कीपूर्ण सन्देशको स्क्रिनसट सेयर गर्दै यसबारे एक्समा पोस्ट गरेका छन् ।

‘अहिले ज्यान मार्ने धम्की आइरहेको छ,’ दिपकेले आफ्नो पोस्टमा लेखेका छन् ।

उनले सेयर गरेको स्क्रिनसट अनुसार, धम्की दिने व्यक्तिले सीजेपीको सामाजिक सञ्जाल खाता सञ्चालन गरेको विषयलाई लिएर धम्की दिएका छन् र कथित रूपमा उक्त खाता बन्द गर्न वा भाजपामा प्रवेश गर्न दबाब दिएका छन् ।

उक्त सन्देशमा लेखिएको थियो, ‘सुन्, तँलाई पैसा हुनेछ, यो अकाउन्ट बन्द गर् नत्र भाजपामा आइज । नत्र अमेरिकामा पनि तँलाई मार्न लगाइदिनेछौं ।’

यसअघि उनका आमाबुबा भगवान् र अनिता दिपकेले भाइरल भएको यो व्यंग्यात्मक राजनीतिक दलका कारण उनी समस्यामा पर्न सक्ने वा पक्राउ समेत पर्न सक्ने भन्दै सार्वजनिक रूपमा डर व्यक्त गरेका थिए ।

पीटीआईका अनुसार, सामाजिक सञ्जालमा कक्रोच जनता पार्टीको तीव्र वृद्धिसँगै अभिजीतको सुरक्षा र सम्भावित गिरफ्तारीलाई लिएर चिन्तामा आफूहरूको निद्रा हराएको उनका आमाबुबाले बताएका छन् ।

‘आजभोलिको राजनीति हेर्ने हो भने उनका जतिसुकै फलोअर्स भए पनि डर लाग्नु स्वाभाविक हो । उनले आफ्नो एउटा अन्तर्वार्तामा भारत फर्किएपछि पक्राउ परिने डर आफैंले व्यक्त गरेका थिए । हामी पत्रपत्रिकामा यस्ता घटनाहरू पढिरहन्छौं,’ भगवान दिपकेले भने ।

उनकी आमा अनिता दिपकेले पनि आफ्नो छोरालाई राजनीतिबाट टाढै रहन र यसको सट्टा आफ्नो करियर बनाउनमा ध्यान दिन अपिल गरेकी थिइन् ।

‘हामी उनी सुरक्षित घर फर्कून् भन्ने मात्र चाहन्छौं । उनले राजनीतिलाई निरन्तरता दिने वा नदिने भन्ने कुरा उनको निर्णय हुनेछ तर हामी उनले यो बाटो नअँगालेको चाहन्छौं । उनले हाम्रो कुरा सुन्छन् कि सुन्दैनन् मलाई थाहा छैन । म उनलाई यसमा समर्थन गर्दिनँ । म उनको बारेमा चिन्तित छु,’ उनले भनिन् ।

सीजेपीको रूपमा लोकप्रिय रहेको कक्रोच जनता पार्टीले अनलाइनमा अभूतपूर्व सफलता पाएको छ र यसले स्थापना भएको केही दिनभित्रै इन्स्टाग्राममा १ करोड ९० लाखभन्दा बढी फलोअर्स बटुलेको छ ।

बोस्टन विश्वविद्यालयका विद्यार्थी रहेका र यसअघि आम आदमी पार्टीसँग सम्बद्ध रहेका दिपकेले भारतका प्रधानन्यायाधीश सूर्यकान्तले एक अदालती सुनुवाइका क्रममा परजीवी र कक्रोच (साङ्ला) सँग सम्बन्धित दिएको भनिएको विवादास्पद अभिव्यक्तिपछि यो व्यंग्यात्मक डिजिटल दल सुरु गरेका हुन् ।

यद्यपि प्रधानन्यायाधीशले पछि आफ्नो भनाइलाई गलत तरिकाले उद्धृत गरिएको र त्यो विशेष गरी नक्कली र झुटा प्रमाणपत्र प्रयोग गरेर कानुनी पेसामा प्रवेश गर्ने व्यक्तिहरूप्रति लक्षित रहेको स्पष्ट पारेका थिए । तर, कक्रोचको बिम्ब अनलाइनमा छिट्टै एउटा भाइरल राजनीतिक व्यंग्य आन्दोलनमा परिणत भयो ।

मीम्स, ग्राफिक्स, घोषणापत्र र व्यंग्यात्मक टिप्पणीहरूको प्रयोग गर्दै कक्रोच जनता पार्टीले बेरोजगारी, शिक्षा, परीक्षाको प्रश्नपत्र चुहावट र सुशासन जस्ता मुद्दाहरूमा केन्द्रित भई युवा सामाजिक सञ्जाल प्रयोगकर्ताहरूमाझ लोकप्रियता कमाएको छ ।