कृषिमा बढ्यो बजेट, ५७ अर्ब २९ करोड बजेट विनियोजन, यस्ता छन् प्राथमिकता

काठमाडौं । सरकारले आगामी आर्थिक बर्षमा कृषि तथा पशुपन्छी विकास मन्त्रालयको लागि ५७ अर्ब २९ करोड रुपैयाँ बिनियोजन गरेको छ ।

चालु आर्थिक बर्ष २०८०/८१ को तुलनामा ६ अर्ब ७० करोड बढी रकम सरकारले आगामी आर्थिक बर्षमा कृषि तथा पशुपन्छी क्षेत्रमा विनियोजन गरेको हो । चालु आर्थिक बर्षमा सरकारले कृषिलाई ५० अर्ब ५९ करोड रुपैयाँ बिनियोजन गरेको थियो । यस्तै शशर्त अनुदानतर्फ प्रदेशलाई १ अर्ब ३ करोड र स्थानीयतर्फ ३ अर्ब ८५ करोड रुपैयाँ बिनियोजन गरिएको थियो ।

सरकारले २०८१ देखि २०९१ सम्मको बर्षलाई कृषिमा लगानी दशक बर्ष घोषणा गर्दै आगामी आर्थिक बर्षको बजेटमार्फत उत्पादनमा आधारित कृषि अनुदानलाई प्राथमिकता दिएको छ । उत्पादनमा आधारित रहेर मल, कृषि यान्त्रिकरण, बैंक ऋण, बीमा, बीउलगायतका क्षेत्रमा अनुदान उपलब्ध गराउने आगामी बर्षको बजेटमार्फत सरकारले घोषणा गरेको छ ।

सरकारले आगामी आर्थिक बर्षमा कृषि उपज हुने सम्भाव्यताको आधारमा बिशेष क्षेत्र घोषणा, करार खेती, चक्लावन्दी खेती, बाँझो जमिनमा खेतीलाई प्राथमिकता राखेको छ ।

यस्तै सरकारी जमिन भाडामा दिने कार्यक्रम पनि प्राथमिकतामा परेको छ । मसिना तथा बास्नादार, चैते धान, कृषि उपज धितोमा राखे ऋण, फलफूल खेतीलगायतका प्राथमिकतमा परेका छन् ।

सरकारले प्रधानमन्त्री कृषि आधुनिकीकरण परियोजनाको लागि २ अर्ब ९८ करोड, रसायनिक मल खरिद गर्न २७ अर्ब ९५ करोड, फलफूल कार्यक्रमका लागि १ अर्ब ४४ करोड, राजमार्ग आसपासमा खेती कार्यक्रमका लागि १ अर्ब १२ करोड, गाईभैसी रोग नियन्त्रण गर्न ३८ करोड, खोप उत्पादन नर्ग ४० करोड, उखु प्रोत्साहन अनुदानको लागि २ अर्ब २५ करोड, कृषि तथा पशुपन्छी बीमाको लागि १ अर्ब ६५ करोड, कृषि अनुसन्धानको लागि ३ अर्ब ५२ करोड रुपैयाँ बिनियोजन गरिएको छ ।