पुस २ गतेदेखि काठमाडौं-दिल्ली उडान हुने

काठमाडौं । गत चैत महिनादेखि बन्द भएको काठमाडौं–दिल्ली हवाई उडान आगामी पुस २ गतेदेखि शुरु हुने भएको छ ।

नेपाल र भारतबीच कुटनीतिकस्तरमा छलफलपछि काठमाडौं–दिल्ली–काठमाडौं उडान शुरु हुने भएको हो ।

जसमध्ये हाल नेपाल र भारतका एक–एक वटा एयरलाइन्सले मात्रै उडान गर्नेछन् । नागरिक उड्डयन प्राधिकरणका अनुसार नेपालबाट नेपाल एयरलाइन्स र भारतबाट एयर इन्डियाले दैनिक एक–एक उडान गर्नेछन् ।

लामो समयदेखि काठमाडौं–दिल्ली उडान बन्द हुँदा विद्यार्थी, बिरामी तथा अन्य मानिसहरु समस्यामा परेका थिए ।

नेपाल एयरलाइन्सकी प्रवक्ता करिश्मा श्रेष्ठका अनुसार नेपाल एयरलाइन्सले पुस २ गतेदेखि दैनिक एक उडान काठमाडौं–दिल्लीका लागि गर्नेछ । यसका लागि तयारी शुरु भइसकेको उनले जानकारी दिइन् ।