विश्वकप जित्ने खेलाडीले अब ट्रफीसँगै औँठी पनि पाउने

एजेन्सी । फिफा विश्वकप २०२६ को विजेता टोलीले यसपटक परम्परागत ट्रफी र स्वर्ण पदकका अतिरिक्त एउटा नयाँ सम्मान पनि पाउने भएको छ, त्यो हो च्याम्पियनसिप औँठी ।

फिफाले बिहीबार यस्तो घोषणा गर्दै यो आफ्नो इतिहासमै पहिलोपटक कुनै प्रतियोगिताको विजेतालाई औँठी प्रदान गर्ने बताएको हो ।

अमेरिकी प्रमुख खेलकुद लिगहरूमा च्याम्पियन बन्ने टोलीलाई औँठी दिने चलन लामो समयदेखि रहिआएको छ ।

सोही परम्परालाई विश्व फुटबलको सबैभन्दा ठूलो मानिने यस प्रतियोगितामा पनि भित्र्याइएको फिफाले जनाएको छ ।

जुलाई १९ मा न्यु यर्क न्यु जर्सी स्टेडियममा हुने फाइनलमा स्पेन र अर्जेन्टिना आमनेसामने हुँदैछन् र यी दुई मध्ये एउटा टोलीले यो ऐतिहासिक औँठी पाउने पहिलो टोली बन्ने भएको छ ।

औँठीको बनावट कस्तो ?

औँठीको एउटा भागमा विश्वकप ट्रफीको आकृति कुँदिएको हुनेछ भने अर्को भाग विजेता टोलीको परिचय झल्काउने गरी अनुकूलित गरिनेछ। प्रत्येक औँठी छुट्टै नम्बर सहितको, ब्यक्तिको नापअनुसार बनाइएको र प्रामाणिकताको प्रमाणपत्रसमेत सहितको हुनेछ ।

फाइनल खेल सकिएलगत्तै विजेता टोलीका कप्तान र प्रमुख प्रशिक्षकले अस्थायी औँठी पाउनेछन् । त्यसपछि टोलीका ३० जना सदस्यका लागि तयार पारिने औँठीहरू व्यक्तिगत नापअनुसार अनुकूलन गरेर पछि औपचारिक समारोहमा प्रदान गरिनेछ ।

कति वटा औँठी बन्दै छन्?

फिफाका अनुसार कुल २,०२६ वटा औँठी उत्पादन गरिनेछ । यो संख्या स्वयं यही विश्वकपको वर्षसँग मेल खान्छ। यी मध्ये ३० वटा विजेता टोलीका खेलाडी र स्टाफलाई दिइनेछ भने बाँकी १,९९६ वटा विश्वभरका फुटबलप्रेमीका लागि आधिकारिक लाइसेन्सप्राप्त उत्पादनका रूपमा बिक्रीमा राखिनेछ । यद्यपि यसको मूल्य अहिलेसम्म सार्वजनिक गरिएको छैन।

फाइनलको तस्बिर

अर्जेन्टिना यसअघि नै विश्वकप विजेता (१९७८, १९८६, २०२२) रहिसकेको छ र यसपटक लगातार दोस्रो पटक तथा समग्रमा सातौं पटक फाइनलमा पुगेको छ । अर्कोतर्फ, स्पेन २०१० को सफलतापछि आफ्नो दोस्रो जीतको खोजीमा छ । दुवै टोली जुलाई १९ को फाइनलमा फुटबलको सबैभन्दा ठूलो पुरस्कार उठाउन तम्तयार छन्।