एजेन्सी । फ्रान्सका राष्ट्रपति इमानुएल म्याक्रों सिरिया भ्रमणमा रहेका बेला राजधानी दमास्कसमा दुईवटा विस्फोटक उपकरण पड्किँदा कम्तीमा १८ जना घाइते भएका छन् ।
सिरियाको गृह मन्त्रालयले चारजना प्रहरी अधिकारीसहित कम्तीमा १८ जना घाइते भएको जनाएको छ । सरकारी समाचार एजेन्सी सानाले मंगलबार यसको जानकारी दिएको हो ।
टेलिभिजन फुटेजमा शहरमा धुवाँको मुस्लो निस्किएको देखिन्थ्यो भने अनलाइनमा सार्वजनिक र अल जजिराले पुष्टि गरेका भिडियोहरूमा एउटा सवारी साधनमा आगो लागिरहेको देखिन्थ्यो ।
अल जजिराका संवाददाताका अनुसार विस्फोट पर्यटन मन्त्रालय र म्याक्रों बस्ने भनिएको एउटा होटल नजिकै भएको थियो । म्याक्रों आफ्ना सिरियाली समकक्षी अहमद अल–शराअसँग वार्ताका लागि राजधानीमा थिए ।
म्याक्रोंको कार्यालयका अनुसार, अल–शराअलाई भेट्न जाँदै गरेका राष्ट्रपतिले विस्फोटको आवाज सुनेनन् र उनको भ्रमण तालिका अनुसार नै सामान्य रूपमा जारी रह्यो ।
गृह मन्त्रालयले सानालाई बताएअनुसार, विस्फोट फ्रान्सेली राष्ट्रपतिको निवासका लागि तोकिएको सुरक्षा क्षेत्र बाहिर भएको थियो । यसले निवास वा औपचारिक भ्रमण कार्यक्रममा कुनै प्रत्यक्ष खतरा पुर्याएन ।
अधिकारीहरूले सडकहरू बन्द गरेका छन् र अनुसन्धान भइरहेको छ ।
‘प्रारम्भिक निष्कर्ष अनुसार दुईवटा विस्फोटक उपकरणहरू घरेलु प्रकृतिका थिए । एउटा सडक किनारमा पार्क गरिएको सवारी साधनभित्र राखिएको थियो भने अर्को फोहोर फाल्ने डब्बामा लुकाइएको थियो,’ गृह मन्त्रालयले सानालाई उद्धृत गर्दै भनेको छ ।
आक्रमणको परिस्थिति पत्ता लगाउन र जिम्मेवार व्यक्तिहरूको पहिचान गर्न अनुसन्धान भइरहेको मन्त्रालयले जनाएको छ ।
राष्ट्रपतिको कार्यालयबाट रिपोर्टिङ गरिरहेका अल जजिराका ओबैदा हिट्टोले त्यहाँको अवस्था शान्त रहेको बताएका छन् । सन् २०२४ को अन्त्यमा बसर अल–असदको सरकार पतन भएपछि दमास्कस भ्रमण गर्ने पहिलो युरोपेली नेताका लागि अभूतपूर्व सुरक्षा उपायहरू अपनाइएको भए पनि विस्फोट भएको उनले बताए ।
हिट्टोले भने, ‘यस घटनाले यहाँको सुरक्षा अवस्था कति संवेदनशील र कमजोर छ भन्ने कुराको स्मरण गराउँछ ।’
एक सुरक्षा अधिकारीले अल जजिरालाई बताएअनुसार विस्फोट सर्वसाधारणको भीडभाड हुने क्षेत्रमा भएको थियो र उनले यसलाई आपराधिक कार्य भनेका छन् ।
दमास्कसस्थित सुरक्षाविज्ञ इस्मत अल–अबसीले अल जजिरालाई बताएअनुसार, विस्फोटको लक्ष्य तत्काल स्पष्ट भइसकेको छैन । ‘हामी निश्चित छैनौं कि फ्रान्सेली राष्ट्रपति सिरियाली राष्ट्रपति अहमद अल–शराअलाई भेट्न जाँदै गर्दा उनको कारकेडलाई निशाना बनाइएको थियो वा थिएन,’ उनले भने, ‘यसको उद्देश्य अशान्ति मच्चाउनु र नकारात्मक सन्देश दिनु रहेको स्पष्ट छ ।
तर, सिरियाको सुरक्षा अवस्थालाई नकारात्मक रूपमा प्रस्तुत हुन नदिन हामीले सुरक्षा कमजोरीहरू सुधार्नु आवश्यक छ ।’
गत साता मध्य दमास्कसको एउटा क्याफेमा भएको विस्फोटमा कम्तीमा नौजनाको मृत्यु भएको थियो भने २० जना घाइते भएका थिए ।
मे २०२५ मा म्याक्रोंले शराअलाई पहिलो आधिकारिक युरोपेली भ्रमणका क्रममा स्वागत गरेका थिए । सोही कदमपछि सिरियाली नेताले गत वर्ष अमेरिकी राष्ट्रपति डोनल्ड ट्रम्पलाई भेट्न वाशिङटनको यात्रा गरेका थिए ।
प्रतिक्रिया