अमेरिकाले इरानविरुद्ध लगाएको जलक्षेत्रीय नाकाबन्दी हटायो

एजेन्सी । पश्चिम एसियाको युद्ध अन्त्य गर्नका लागि दुई देशबीच सम्झौता भएसँगै अमेरिकाले इरानमाथिको सामुद्रिक नाकाबन्दी हटाएको छ ।

अमेरिकी सेनाको सेन्ट्रल कमान्डले सामाजिक सञ्जाल एक्स मार्फत राष्ट्रपतिको निर्देशन बमोजिम नाकाबन्दी अन्त्य भएको पुष्टि गर्दै केही अमेरिकी जहाजहरू सोही क्षेत्र आसपास रहने बताएको छ ।

त्यसको लगत्तै इरानका सर्वोच्च नेता मोज्तबा खामेनेईले आफ्नो फरक धारणा हुँदाहुँदै पनि अमेरिकासँगको सम्झौतालाई अनुमोदन गरेको बताए । तर, उनले यसबारे थप व्याख्या गरेनन् ।

इरानका राष्ट्रपति मसुद पेजेस्कियानले इरानी राष्ट्रको अधिकार रक्षा गर्ने आश्वासन दिएपछि मात्र यसलाई अघि बढाउन अनुमति दिएको उनले बताए ।

राष्ट्रपति ट्रम्पले निराशाको अवस्थामा यो सम्झौता गराउन सबै प्रकारका दबाबका उपायहरू प्रयोग गरेको खामेनेईले बताए ।
सर्वोच्च नेताले तेहरान र वाशिङटनबीच भविष्यमा प्रत्यक्ष वार्ता हुने भए तापनि यसको अर्थ शत्रुको अडानलाई स्वीकार गर्नु नहुने बताए ।

सम्झौताप्रति खामेनेईले प्रतिक्रिया दिएको यो पहिलोपटक हो । फेब्रुअरी २८ मा इरानमाथि भएको अमेरिका–इजरायल आक्रमणमा आफ्ना पिता तथा पूर्ववर्ती आयातोल्लाह अली खामेनीको हत्या भएपछि मार्चमा पदभार ग्रहण गरेदेखि उनी सार्वजनिक रूपमा देखिएका छैनन् । सोही आक्रमणले क्षेत्रीय युद्ध निम्त्याएको थियो ।

ट्रम्पले खामेनेईको भनाइमा प्रत्यक्ष प्रतिक्रिया दिएनन् तर ट्रुथ सोसलमा एउटा पोस्ट गर्दै उनले इजरायल र लेबननमा इरान समर्थित हिजबुल्लाहबीच सहित सबै मोर्चामा युद्धविराम लागू हुने अपेक्षा गरेको बताए । उनले पश्चिम एसियाका देशहरूले हाम्रो वार्तालाई अघि बढ्न दिने प्रतिबद्धता कायम राख्ने आशा समेत व्यक्त गरे ।

अमेरिका–इरान सम्झौता हर्मुज जलसन्धि पुनः खोल्ने, इरानले कहिल्यै आणविक हतियार राख्न नपाउने र इरानको पुनर्निर्माण तथा आर्थिक विकासका लागि ३०० अर्ब डलरको कोष स्थापना गर्ने जस्ता १४ मुख्य बुँदाहरूमा केन्द्रित छ यद्यपि अमेरिकाले यसमा योगदान दिनुपर्ने छैन ।