जी७ सम्मेलनअघि स्विट्जरल्यान्डमा हिंस्रक विरोध प्रदर्शन

एजेन्सी । फ्रान्समा हुन लागेको जी–७ शिखर सम्मेलनप्रति आक्रोश व्यक्त गर्दै स्विट्जरल्यान्डमा प्रदर्शनकारीहरूले टेस्ला गाडीमा आगजनी र संयुक्त राष्ट्रसंघको एउटा निकायको झ्याल तोडफोड गरेपछि जेनेभा प्रहरीले आइतबार उनीहरूमाथि अश्रुग्यास प्रहार गरेको छ ।

सुरुमा शान्तिपूर्ण रहेको उक्त र्यालीमा करिब २० हजार मानिस भेला भएका थिए । तर, पछि प्रदर्शनकारीहरूले पुँजीवाद र बहुपक्षीयताको प्रतीकका रूपमा लिएका पार्क गरिएको टेस्ला र संयुक्त राष्ट्रसंघको कार्यालय जस्ता ठाउँहरूलाई निसाना बनाए ।

रोयटर्सका प्रत्यक्षदर्शीहरूका अनुसार, प्रदर्शनकारीहरूले भुइँबाट इँटा उक्काएर प्रहरीमाथि प्रहार गरेका थिए भने जेनेभाको घामले ततिएका सडकहरूमा अश्रुग्यास फैलिँदा बालबालिकाहरू रोइरहेका देखिन्थे ।

वर्षौंदेखि जी–७ का भेलाहरूमा विरोध प्रदर्शन सामान्य जस्तै बनेका छन् । त्यहाँ धेरै प्रदर्शनकारीहरूले यस शिखर सम्मेलनलाई पुँजीवाद, भूमण्डलीकरण, जलवायु परिवर्तन र असमानताको निन्दा गर्न प्रयोग गर्ने गर्छन् ।

प्रदर्शनकारीहरूले जी–७ लाई केन्द्रित राजनीतिक र आर्थिक शक्तिको प्रतीकको रूपमा विरोध गर्न आफूहरू आएको बताएका छन् । गत साता अमेरिकाका राष्ट्रपति डोनल्ड ट्रम्पको सल्लाहकारको रूपमा काम गरिसकेका टेस्लाका मालिक इलोन मस्क विश्वकै पहिलो डलर ट्रिलियनियर (१० खर्बपति) बनेका छन् ।

प्रदर्शनकारी पिप्पा सौगीले भनिन्, ‘मेरो लागि यो धनीहरूको यस्तो बैठक हो जसले गरिबहरू पछि पर्दै गर्दा धनीहरू कसरी झन् धनी हुन सक्छन् भन्ने कुरा पुनः प्रमाणित गर्छ ।’

जेनेभा तालको किनारमा रहेको एभियान–लेस–बेन्समा जुन १५–१७ सम्म हुने जी–७ शिखर सम्मेलनले फ्रान्स, बेलायत, क्यानडा, जर्मनी, इटली, जापान र अमेरिकाका नेताहरूका साथै युरोपेली संघलाई पनि एकै ठाउँमा ल्याउनेछ ।

पश्चिम एसिया र युक्रेनमा भइरहेका युद्धहरू एजेन्डामा हाबी हुने देखिन्छन् जबकि नेताहरूले राष्ट्रपति ट्रम्पसँगको टकरावलाई टार्ने प्रयास गर्नेछन् किनभने उनी इरानसँगको शान्ति सम्झौताको खाकालाई अन्तिम रूप दिने प्रयासमा छन् ।

जेनेभामा हिंसाको पूर्व चिन्ताका बीच व्यापारिक प्रतिष्ठानहरू बन्द गरिएका थिए र सडकमा सयौं दंगा प्रहरी परिचालन गरिएको थियो । माटिया पिक्कार्डले ठूलो संख्यामा प्रहरीको उपस्थितिलाई लिएर असन्तुष्टि जनाउँदै भने, ‘यो प्रदर्शनकारी र आम मानिसलाई तर्साउने र उनीहरूलाई विरोधमा उत्रिन निरुत्साहित गर्ने प्रयास हो ।’

अर्की प्रदर्शनकारी क्लेलिया कोलिनले लैंगिक असमानताको मुद्दा उठाउन चाहेको बताउँदै भनिन्, ‘जी–७ ले प्रतिनिधित्व गर्ने मूल्यमान्यताहरू पूर्णतया महिलाद्वेषी छन् र तिनले असमानता बढाउन मद्दत गर्छन् ।’