बेलायती प्रधानमन्त्री कियर स्टार्मरले १६ वर्ष मुनिका बालबालिकाहरूका लागि सामाजिक सञ्जालको प्रयोगमा प्रतिबन्ध लगाउने घोषणा गर्ने तयारी गरेका छन्।
अन्तर्राष्ट्रिय सञ्चारमाध्यमहरूका अनुसार प्रधानमन्त्री स्टार्मरले एक विशेष सम्बोधन मार्फत यो नयाँ नीति सार्वजनिक गर्ने तयारी छ ।
सरकारले बालबालिकालाई अनलाइन माध्यमबाट हुन सक्ने जोखिमबाट जोगाउन यो कडा कदम चाल्न लागेको बताइएको छ ।
यो प्रतिबन्ध अस्ट्रेलियाले हालै लागू गरेको नियमसँग मिल्दोजुल्दो हुनेछ। यसअन्तर्गत टिकटक, युट्युब, इन्स्टाग्राम, फेसबुक, एक्स (ट्विटर), रेडिट, थ्रेड्स, स्न्यापच्याट, र ट्वीच जस्ता लोकप्रिय प्लेटफर्महरूमा १६ वर्ष मुनिका बालबालिकाको पहुँचलाई रोक लगाइनेछ। गेमिङ एपहरूमा भने पूर्ण प्रतिबन्ध नलगाइए पनि अपरिचित व्यक्तिहरूसँग कुराकानी गर्न मिल्ने ‘च्याट’ सुविधाहरू हटाउनुपर्ने प्रावधान राखिनेछ।
यसका साथै, १८ वर्ष मुनिका प्रयोगकर्ताहरूका लागि यौनजन्य वा रोमान्टिक च्याटबोटहरूको पहुँच निषेध गरिनेछ र राती अबेरसम्म सामाजिक सञ्जाल चलाउने (लेट-नाइट स्क्रोलिङ) प्रवृत्तिलाई पनि नियन्त्रण गरिनेछ ।
पछिल्लो समय बालबालिकाको मानसिक स्वास्थ्यमा सामाजिक सञ्जालले पारेको गम्भीर असरलाई लिएर विश्वभर बहस भइरहेको छ । बेलायतमा मारिएकी किशोरी ब्रियाना घेकी आमाले सामाजिक सञ्जालमा उपलब्ध हानिकारक सामग्रीकै कारण आफ्नी छोरीमा खानपान सम्बन्धी समस्या र आत्म-हानि गर्ने प्रवृत्ति बढेको भन्दै प्रतिबन्धको माग गर्दै आएकी थिइन् । सरकारले यो नीति कार्यान्वयन गर्न विद्यमान नियामक निकायको शक्ति प्रयोग गर्ने वा आवश्यक परे नयाँ कानुन नै निर्माण गर्ने तयारी गरेको छ ।
यद्यपि, यो प्रस्तावित प्रतिबन्धको आलोचना पनि भइरहेको छ। कतिपय विज्ञहरूले यस्तो प्रतिबन्धले बालबालिकालाई डिजिटल संसारबाट एक्ल्याउने र उनीहरूको गोपनीयतामा समेत खतरा पुऱ्याउन सक्ने तर्क गरेका छन् । उमेर प्रमाणीकरण गर्ने विधिहरू पूर्ण रूपमा भरपर्दो नहुने र यसले इन्टरनेटमा प्रयोगकर्ताको परिचय लुकाउन पाउने अधिकारलाई कमजोर बनाउने भन्दै गोपनीयताका अधिकारकर्मीहरूले चिन्ता व्यक्त गरेका छन् । बालबालिकाको मानसिक स्वास्थ्य सुधारमा यो कदम कत्तिको प्रभावकारी हुन्छ भन्नेमा पनि विभिन्न संशयहरू व्यक्त गरिएका छन् ।
प्रतिक्रिया