एजेन्सी । फोर्डले अमेरिकामा २ लाख ५५ हजार ४ सय ४ सवारीसाधनहरू फिर्ता बोलाउँदैछ ।
यो निर्णय क्यानिसटर पर्ज भल्भको समस्याका कारण लिइएको हो । त्यसमा खराबी आउँदा गाडी चलाउँदा चलाउँदै इन्जिन अचानक बन्द हुन सक्छ ।
यसबारे अमेरिकी नेशनल हाइवे ट्राफिक सेफ्टी एडमिनिस्ट्रेशनले शुक्रबार जानकारी दिएको हो । नियामकका अनुसार, यो फिर्ता प्रक्रियाले सन् २०१२ देखि २०१८ सम्मका केही फोकस मोडलका गाडीहरूलाई असर गर्छ । त्यसलाई यसअघि गलत तरिकाले मर्मत गरिएको थियो ।
एनएचटीएसएका अनुसार, डिलरहरूले पावरट्रेन कन्ट्रोल मोड्युल सफ्टवेयर निःशुल्क अपडेट गरिदिनेछन् । प्रभावित सवारीसाधनहरूमा खराबी जनाउने सूचक बत्ती बलेको हुन सक्ने वा ग्राहकहरूले इन्धन सूचकले गलत विवरण देखाएको पाउन सक्ने नियामकले थप जानकारी दिँदै भनेको छ ।
यससँगै फोर्डले सेन्टर कन्सोलको समस्याका कारण अमेरिकामा ५ लाख ४८ हजार ४ सय ६३ सवारीसाधनहरू फिर्ता बोलाउँदैछ । यसबारे अमेरिकी नेशनल हाइवे ट्राफिक सेफ्टी एडमिनिस्ट्रेशनले बिहीबार जानकारी दिएको हो ।
यो समस्या कन्सोलको क्रोम प्लेटिङसँग सम्बन्धित छ जुन समयसँगै फुल्ने र उप्किने हुन सक्छ । यसले गर्दा कन्सोलमा तिखो धार बन्न सक्छ र ती धारहरूको सम्पर्कमा आउने यात्रुहरूलाई चोट लाग्ने उच्च जोखिम रहने नियामकले जनाएको छ ।
यो फिर्ता प्रक्रियाले सन् २०१८ देखि २०२४ सम्मका केही फोर्ड एक्सपिडिसन गाडीहरूलाई असर गर्छ । एनएचटीएसएका अनुसार, यो समस्या सप्लायरले फोर्डको मापदण्ड पूरा नगरी बनाएको सेन्टर कन्सोल क्रोम ट्रिमका कारण भएको हुन सक्छ ।
नियामकका अनुसार, समाधानका रूपमा डिलरहरूले सेन्टर कन्सोलको निरीक्षण गर्नेछन् र आवश्यक परेमा निःशुल्क बदलिदिनेछन् ।
त्यस्तै होन्डा मोटर अमेरिकाले टायर मर्मत किटमा त्रुटि भेटिएका कारण अमेरिकामा १० लाख ४९ हजार ८ सय ८३ सवारी साधनहरू फिर्ता बोलाइरहेको छ । यसबारे नेशनल हाइवे ट्राफिक सेफ्टी एडमिनिस्ट्रेशनले बुधबार जानकारी दिएको हो ।
यस समस्यामा दोषपूर्ण सिलान्ट बोतल रहेको छ जसमा दबाब बढ्न सक्छ र यसले बोतलको बिर्को अचानक उम्किएर गोली जस्तै उछिट्टिन सक्ने जोखिम रहन्छ ।
अमेरिकी सुरक्षा नियामकका अनुसार, यो फिर्ता प्रक्रियामा केही होन्डा एकर्ड हाइब्रिड, सीआर–भी फ्युल सेल ईभी, र सीआर–भी हाइब्रिड गाडीहरू समावेश छन् । यस समस्याको समाधानका लागि डिलरहरूले टायर मर्मत किटको नोजल वा सिलान्ट बोतल निःशुल्क बदलिदिनेछन् ।
प्रतिक्रिया