एजेन्सी । अमेरिकाका राष्ट्रपति डोनल्ड ट्रम्पले यसअघि गरेका दाबीहरूका बावजुद इरानले आफ्नो संवर्धित युरेनियम अमेरिकालाई हस्तान्तरण नगर्ने इरानका परराष्ट्र राज्यमन्त्री सइद खतिबजादेले एसोसिएटेड प्रेसलाई बताएका छन् ।
शुक्रबार ट्रम्पले इरानको संवर्धित युरेनियम अमेरिका फिर्ता ल्याउनका लागि वाशिङटनले तेहरानसँग मिलेर काम गर्ने बताएका थिए ।
खतिबजादेले भने, ‘म तपाईंलाई भन्न सक्छु, कुनै पनि संवर्धित सामग्री अमेरिका पठाइने छैन । यो कुरा सुरु नै हुन सक्दैन र म तपाईंलाई आश्वस्त पार्न चाहन्छु कि हामी हाम्रा चिन्ताहरूलाई सम्बोधन गर्न तयार भए पनि यस्ता असम्भव प्रस्तावहरू स्वीकार गर्ने छैनौं ।’
सोही अन्तर्वार्तामा खतिबजादेले अमेरिकालाई इरानले अत्यधिक ठानेका मागहरूमा अडिग रहेको आरोप लगाए ।
खतिबजादेले थपे, ‘हामी अझै पनि वास्तविक बैठकमा जान सक्ने अवस्थामा पुगेका छैनौं किनकि केही मुद्दाहरूमा अमेरिकीहरूले अझै पनि आफ्नो चरम अडान छोडेका छैनन् ।’
प्रतिक्रिया