हर्मुज बन्द भएयता ओपेक प्लसले चौथोपटक तेल उत्पादन लक्ष्य बढाउने

एजेन्सी । तीन ओपेक प्लस स्रोतहरूका अनुसार, अमेरिका–इरान युद्धले अझै पनि समूहका धेरै सदस्यहरूलाई थप तेल उत्पादन गर्नबाट रोक लगाइरहेको भए तापनि ओपेक प्लस आइतबार तेल उत्पादन लक्ष्यमा लगातार चौथो महिनाको वृद्धि गर्न सहमत हुने देखिएको छ ।

युद्धले हर्मुज जलयोजकमार्फत हुने तेलको प्रवाहमा कटौती गरेको छ । त्यसले विश्वकै अहिलेसम्मको ठूलो आपूर्ति संकट निम्त्याएको छ । फेब्रुअरीको अन्त्यदेखि साउदी अरबसहित ओपेक प्लसका प्रमुख सदस्यहरू आफ्ना ग्राहकहरूलाई पूर्ण रूपमा आपूर्ति गर्न असमर्थ भएका छन् ।

झण्डै ६० वर्षपछि संयुक्त अरब अमिरात (यूएई) पेट्रोलियम निर्यातक देशहरूको संगठन (ओपेक) बाट बाहिरिएपछि ओपेक प्लसको संकट अझ गहिरिएको छ ।

ओपेक र रुस लगायतका सहयोगी उत्पादकहरूको समूह ओपेक प्लसका सात प्रमुख सदस्यहरूले अप्रिलदेखि जुनसम्म आफ्नो उत्पादन कोटा दैनिक झण्डै ६ लाख ब्यारलले बढाएका छन् ।

ओपेकको तथ्यांक अनुसार, वास्तवमा खाडी मुलुकका सदस्यहरूले गरेको निर्यात कटौतीका कारण यस समूहको उत्पादनमा भारी गिरावट आएको छ । यो फेब्रुअरीमा दैनिक ४ करोड २७ लाख ७० हजार ब्यारल रहेकोमा अप्रिलमा औसत ३ करोड ३१ लाख ९० हजार ब्यारलमा झरेको छ ।

स्रोतहरूका अनुसार, आइतबार ती सात सदस्यहरूले जुलाईदेखि लागू हुने गरी उत्पादन लक्ष्य दैनिक करिब १ लाख ८८ हजार ब्यारलले बढाउने सम्भावना छ ।

यो जुन महिनामा गरिएको वृद्धि जत्तिकै हो जसलाई यूएई बाहिरिएको कुरालाई ध्यानमा राख्दै मे र अप्रिलको मासिक वृद्धि (दैनिक २ लाख ६ हजार ब्यारल) बाट घटाएर समायोजन गरिएको थियो ।

सबै स्रोतहरूले नाम नखुलाउने शर्तमा यो जानकारी दिएका हुन् र उनीहरूले अन्तिम निर्णय हुन बाँकी रहेको बताएका छन् ।
आइतबार बैठक बस्ने ओपेक प्लसका २१ मध्ये सात सदस्यहरू साउदी अरब, इराक, कुवेत, अल्जेरिया, काजाकस्तान, रुस र ओमान हुन् ।

आइतबार नै ओपेक प्लसको पूर्ण मन्त्रीस्तरीय बैठक पनि तय गरिएको छ । तर, यसले कुनै पनि नीतिगत परिवर्तन गर्ने अपेक्षा नगरिएको स्रोतहरूले बताएका छन् ।