काठमाडौं । आगामी २१ फागुनमा हुने प्रतिनिधिसभा निर्वाचनका लागि मुलुकको अर्थतन्त्रको बागडोर सम्हालिसकेका पूर्वअर्थमन्त्रीहरू चुनावी मैदानमा उत्रिएका छन् ।
केही प्रभावशाली पूर्वअर्थमन्त्रीहरू आफ्नो विरासत जोगाउन संघर्षरत रहँदा केही भने यस पटक चुनावी प्रतिस्पर्धाबाट बाहिरिएका छन् ।
को कहाँबाट उम्मेदवार ?
यसअघि चुनाव नलड्ने घोषणा गरेका पूर्वप्रधानमन्त्रीसमेत भइसकेका पूर्वअर्थमन्त्री डा. बाबुराम भट्टराईले आफ्नो निर्णय बदल्दै गोरखा–२ बाट उम्मेदवारी दिएका छन् ।
प्रगतिशील लोकतान्त्रिक पार्टीबाट चुनावी मैदानमा होमिएका उनले गत निर्वाचनमा माओवादी केन्द्रका अध्यक्ष पुष्पकमल दाहाल ‘प्रचण्ड’ का लागि यो क्षेत्र छाडेका थिए ।
नेकपा एमालेका उपाध्यक्ष तथा पटक–पटक अर्थमन्त्री बनेका विष्णुप्रसाद पौडेल यसपालि पनि रुपन्देही–२ बाटै चुनाव लड्दैछन्। सुरुमा पाल्पाबाट उठ्ने तय भए पनि बिरोधपछि एमालेले उनलाई पुरानै क्षेत्रमा टिकट दिएको हो । पौडेल २०५६ देखि सोही क्षेत्रमा सक्रिय छन् ।
त्यस्तै, नेपाली कांग्रेसबाट पूर्वअर्थमन्त्री रहेका डा. प्रकाशशरण महत नुवाकोट–१ बाट उम्मेदवार बनेका छन् । सो क्षेत्रमा यसअघि माओवादीका हितबहादुर तामाङ विजयी भएका थिए ।
कांग्रेसकै अर्का नेता ज्ञानेन्द्रबहादुर कार्की पुन: सुनसरी–४ बाटै प्रतिस्पर्धा गर्दैछन् ।
नेपाली कम्युनिस्ट पार्टीका नेता वर्षमान पुन तेस्रो पटक रोल्पाबाट चुनावी प्रतिस्पर्धामा छन् । २०७४ र २०७९ को निर्वाचन जितेका उनी यस पटक पनि जित निकाल्ने दाउमा छन् ।
यता, प्रचण्डसँग अलग भएर प्रगतिशील लोकतान्त्रिक पार्टीका नेता जनार्दन शर्मा रुकुम पश्चिमबाट पाँचौँ जितको खोजीमा छन् । उनी यसअघि सोही क्षेत्रबाट चार पटक विजयी भइसकेका छन् । तर, प्रचण्डको साथ छाडेका उनलाई चुनौती थपिएको विश्लेषण गरिएको छ।
पूर्वअर्थराज्य मन्त्री उदय शम्शेर राणा पनि उम्मेदवार बनेका छन् । उनी ललितपुर १ बाट कांग्रेसका उम्मेदवार बनेका हुन् ।
चुनावी मैदानमा छैनन् चर्चित अनुहार
यसपालिको निर्वाचनमा केही चिरपरिचित अनुहारहरू भने देखिने छैनन् । कांग्रेसका बौद्धिक नेता तथा पूर्वअर्थमन्त्री डा. रामशरण महत स्वास्थ्य अवस्थाका कारण सक्रिय राजनीतिबाट टाढिएका छन् । उनको स्थानमा भाइ प्रकाशशरणले टिकट पाएका छन् । त्यस्तै, कांग्रेसका अर्का नेता महेश आचार्य पनि यस पटक प्रतिस्पर्धामा छैनन्।
एमालेका पूर्वअर्थमन्त्रीहरू सुरेन्द्र पाण्डेले यस पटक टिकट पाएनन् भने डा. युवराज खतिवडा पनि चुनावी अभियानमा सहभागी छैनन् ।
नेपाली कम्युनिस्ट पार्टीका नेता कृष्णबहादुर महरा, राप्रपाका डा. प्रकाशचन्द्र लोहनी यस पटकको चुनावी दौडमा छैनन् ।
प्रतिक्रिया