एजेन्सी । सन् २०२५ को तेस्रो त्रैमासिकको कुल गार्हस्थ्य उत्पादन (जीडीपी) को प्रारम्भिक आँकडाले अमेरिकी अर्थतन्त्रमा ४.३ प्रतिशतको वृद्धि भएको अमेरिकाको वाणिज्य मन्त्रालयले मंगलबार सार्वजनिक गरेको तथ्यांकले देखाएको छ ।
यो दोस्रो त्रैमासिकमा देखिएको ३.८ प्रतिशतभन्दा निकै तीव्र गति हो । यो दुई वर्षयताकै सबैभन्दा उच्च वृद्धिदर हो ।
उपभोक्ता खर्चमा भएको वृद्धि (दोस्रो त्रैमासिकको २.५ प्रतिशतबाट बढेर ३.५ प्रतिशत) र निर्यात (दोस्रो त्रैमासिकको –१.८ प्रतिशतबाट बढेर ८.८ प्रतिशत) तेस्रो त्रैमासिकको जीडीपी आँकडाका मुख्य योगदानकर्ताहरू थिए ।
यसमा संघीय खर्चले पनि महत्त्वपूर्ण भूमिका खेल्यो । यो रक्षा खर्चमा भएको ठूलो वृद्धिका साथै संघीय कर्मचारीहरूका लागि गरिएको बाईआउटको प्रतिबिम्ब हो । अन्ततोगत्वा यो सरकारी खर्च घटाउने प्रयासहरूको हिस्सा हो ।
तर, अर्को महिना सार्वजनिक हुने चौथो त्रैमासिकको जीडीपी प्रतिवेदन ४३ दिने सरकारी सटडाउनका कारण संघीय खर्चमा आउने गिरावटले नकारात्मक रूपमा प्रभावित हुने अपेक्षा गरिएको छ ।
यो प्रतिवेदन व्यापक भन्सार शुल्कहरूको प्रतिबिम्ब भएको अमेरिकाका राष्ट्रपति डोनाल्ड ट्रम्पले मंगलबार बताए । उनले तेस्रो त्रैमासिकमा भन्सार शुल्क उल्लेखनीय रूपमा बढाएका थिए । तर, सर्वोच्च अदालतमा विचाराधीन एक मुद्दाले उनले लागू गरेका धेरै भन्सार शुल्कहरूलाई खारेज गर्न सक्छ र सम्भावित रूपमा आयातकर्ताहरूलाई ठूलो मात्रामा रकम फिर्ता गर्नुपर्ने हुन सक्छ ।
‘अहिले भर्खरै घोषणा गरिएका अमेरिकाको उत्कृष्ट आर्थिक तथ्यांकहरूका लागि भन्सार शुल्कहरू जिम्मेवार छन् र यी अझै राम्रो हुँदै जानेछन्,’ ट्रम्पले आफ्नो सामाजिक सञ्जाल प्लेटफर्ममा लेखे, ‘साथै, कुनै मुद्रास्फीति छैन र उत्कृष्ट राष्ट्रिय सुरक्षा छ । अमेरिकाको सर्वोच्च अदालतको लागि प्रार्थना गर्नुहोस् ।’
ट्रम्पले अर्थतन्त्रलाई बढावा दिन फेडरल रिजर्भलाई ब्याजदर घटाउन बारम्बार दबाब दिँदै आएका छन् । मंगलबारको प्रतिवेदनले केन्द्रीय बैंकलाई अर्को महिना बैठक बस्दा ब्याजदर कटौती गर्ने अझ कम आधार दिने सम्भावना छ ।
जीडीपी प्रतिवेदन अर्थतन्त्रको माथिल्लो सतहबाट हेरिएको दृश्य जस्तै हो । त्यस दृष्टिकोणबाट हेर्दा अर्थतन्त्र मजबुत स्थितिमा रहेको देखिन्छ । तर, अझ नजिकबाट नियाल्दा यो त्यति सुखद देखिँदैन ।
धनी अमेरिकीहरूले उपभोक्ता खर्चको वृद्धिलाई निरन्तरता दिइरहेका बेला निम्न र मध्यम आय भएका उपभोक्ताहरू भने निकै सतर्क देखिएका छन् । अर्थशास्त्रीहरूले यस घटनालाई के–आकारको अर्थतन्त्र भन्ने गर्छन् ।
आइएनजीका मुख्य अन्तर्राष्ट्रिय अर्थशास्त्री जेम्स नाइटलीले जीडीपी प्रतिवेदन सार्वजनिक भएपछि मंगलबारको एक टिपोटमा भने, ‘के–आकारको अर्थतन्त्र स्पष्ट रूपमा हाम्रा सामु देखिएको छ,’ उनले भने, ‘आर्थिक वृद्धि उच्च आय भएका परिवार र प्रविधिमा आधारित लगानीमा केन्द्रित छ जबकि व्यापक उपभोक्ता विश्वासको दबाबमा छ ।’
जीडीपी प्रतिवेदन सार्वजनिक भएको दुई घण्टाभन्दा कम समयमै कन्फरेन्स बोर्डले यस महिना उपभोक्ता विश्वासमा उल्लेख्य गिरावट आएको जानकारी दियो । त्यो नोभेम्बरको तुलनामा ३.८ अंकले घटेको छ । डिसेम्बरको ८९.१ को आँकडा अप्रिलपछिकै न्यून हो । त्यतिबेला ट्रम्पले आफ्नो मुक्ति दिवस (लिबरेशन डे) भन्सार शुल्कहरू लागू गरेका थिए ।
आफ्नो परिवारको वर्तमान आर्थिक अवस्थाबारे उपभोक्ताहरूको दृष्टिकोण झण्डै चार वर्षमा पहिलोपटक नकारात्मक बनेको प्रतिवेदनले देखाएको छ ।
सबै आयस्तरका उपभोक्ताहरूले श्रम बजारको अवस्थाबारे पनि थप चिन्ता व्यक्त गरेका छन् । बेरोजगारी दर हालै चार वर्षकै उच्च विन्दुमा पुगेको छ । जागिरहरू प्रशस्त छन् भन्नेहरूको हिस्सा चार वर्षयताकै न्यून स्तरमा झरेको छ । यसैबीच सेप्टेम्बर २०२४ पछि पहिलोपटक व्यवसायहरूले अर्थतन्त्रप्रति शुद्ध नकारात्मक दृष्टिकोण व्यक्त गरेका छन् ।
प्रतिक्रिया