चीन र रुसलाई टक्कर दिनका लागि अमेरिका र जापानले गरे संयुक्त हवाई अभ्यास

एजेन्सी । जापान र दक्षिण कोरिया वरपरको आकाश र समुद्रमा चीन र रुसले अभ्यास गरेलगत्तै शक्तिप्रदर्शनका रूपमा बुधबार अमेरिका र जापानले सी अफ जापानमाथि उडान भरेको टोकियोले जनाएको छ ।

त्यसक्रममा अमेरिकाले आणविक हतियार बोक्न सक्ने बमवर्षकहरू उडाएको थियो भने जापानका लडाकु विमानहरू पनि सँगै उडेका थिए ।

‘बल प्रयोग गरेर यथास्थितिलाई परिवर्तन गर्ने कुनै पनि एकपक्षीय प्रयासलाई रोक्ने आफ्नो दृढ संकल्पलाई पुनः पुष्टि गर्दै जापान र अमेरिकाले सेल्फ–डिफेन्स फोर्सेज तथा अमेरिकी सेना दुवैको तयारी अवस्थाको सुनिश्चितता गरेका छन्,’ जापानको रक्षा मन्त्रालयले बिहीबार जारी गरेको प्रेस विज्ञप्तिमा उल्लेख छ ।

गत साता चीनले यस क्षेत्रमा सैन्य अभ्यास सुरु गरेयता अमेरिकाले आफ्नो सैन्य उपस्थिति जनाएको यो पहिलो घटना हो ।

त्यसमा दुई अमेरिकी बी–५२ रणनीतिक बमवर्षक विमानहरूले तीन जापानी एफ–३५ स्टेल्थ फाइटर र तीन एफ–१५ एयर–सुपिरियरिटी जेटहरूसँग उडान भरेका थिए ।

मंगलबार पूर्वी चीन सागर र पश्चिमी प्रशान्त क्षेत्रमा चिनियाँ र रुसी रणनीतिक बमवर्षकहरूको संयुक्त उडान तथा छुट्टै चिनियाँ विमानवाहक युद्धपोत अभ्यासपछि यो प्रदर्शन भएको हो । उक्त चिनियाँ अभ्यासका कारण जापानले आफ्ना लडाकु विमानहरू परिचालन गर्नुपरेको थियो । त्यसलाई टोकियोले रेडार बिमको निशाना बनाइएको बताएको छ ।

यस घटनाले वाशिङटनको आलोचना निम्त्याएको छ । वाशिङटनले यो घटना क्षेत्रीय शान्ति र स्थिरताका लागि अनुकूल नभएको बताउँदै जापानसँगको आफ्नो गठबन्धन अटल रहेको पुनः पुष्टि गरेको छ ।

जापान र दक्षिण कोरिया दुवै देशमा अमेरिकी सेना रहेका छन् । विदेशमा रहेको अमेरिकी सैन्यशक्तिको सबैभन्दा ठूलो उपस्थिति जापानमै छ । त्यसमा एयरक्राफ्ट क्यारियर स्ट्राइक ग्रुप र यूएस मरिन एक्सपिडिशनरी फोर्स समावेश छन् ।
चीनले भने टोकियोको आरोप अस्वीकार गर्दै विमानवाहक युद्धपोत नजिक उडेका जापानी लडाकु विमानहरूले जापानको दक्षिणी भागमा भइरहेको आफ्नो हवाई सञ्चालनलाई जोखिममा पारेको बताएको छ ।

दक्षिण कोरियाली सेनाले पनि मंगलबार चिनियाँ र रुसी विमानहरू आफ्नो वायु रक्षा पहिचान क्षेत्रमा प्रवेश गरेपछि लडाकु विमानहरू परिचालन गरेको जनाएको छ । यो क्षेत्र उसको मुख्य हवाई क्षेत्रभन्दा बाहिरसम्म फैलिएको छ र यसलाई प्रारम्भिक चेतावनीका लागि प्रयोग गरिन्छ ।

गत महिना जापानकी प्रधानमन्त्री सानाए ताकाइचीले ताइवानमाथि चीनले काल्पनिक आक्रमण गरेको खण्डमा टोकियोले कस्तो प्रतिक्रिया जनाउन सक्छ भन्ने विषयमा गरेको टिप्पणीले बेइजिङसँग विवाद बढाएपछि क्षेत्रीय तनाव चुलिएको छ ।

चीनले लोकतान्त्रिक शासन रहेको ताइवान आफ्नो भूभाग भएको दाबी गर्दछ र उक्त टापुलाई नियन्त्रणमा लिन बल प्रयोग गर्ने सम्भावनालाई खारेज गरेको छैन । ताइवान जापानी भूभागबाट १०० किलोमिटरभन्दा केही बढी दूरीमा अवस्थित छ र यो टोकियो निर्भर रहने समुद्री मार्गहरूले घेरिएको छ ।