काठमाडौं । नेकपा (एकीकृत समाजवादी) का वरिष्ठ नेता वामदेव गौतमले पार्टीलाई उत्पादनमा आधारित बनाउने खाका प्रस्तुत गर्दै सदस्य संख्या एक करोड पुर्याउन सकिने दाबी गरेका छन्।
बुधबार काठमाडौंमा आयोजित कम्युनिस्ट घटकहरूको एकता घोषणा सभामा सम्बोधन गर्दै उनले पार्टी र कार्यकर्ताले पुँजीपतिसँग चन्दा माग्ने होइन, आफ्नै श्रमबाट जीविका चलाउने प्रणाली विकास गर्नुपर्नेमा जोड दिए ।
उनका अनुसार, यदि पार्टीले श्रम र उत्पादनमा आधारित संरचना निर्माण गर्न सके जनताको विश्वास पुनः हासिल गर्न र संगठनलाई बलियो बनाउन सकिनेछ ।
गौतमले संविधानमा लोकतान्त्रिक मूल्य र मान्यतामा आधारित समाजवाद निर्माण गर्ने व्यवस्था भए पनि त्यसको कार्यान्वयन नभएको भन्दै नेतृत्वप्रति असन्तुष्टि व्यक्त गरे।
‘संविधान जारी भएको यतिका वर्ष भयो, हामीले पटक–पटक सरकार चलायौँ, तर समाजवाद निर्माणको दिशामा किन अघि बढेनौँ? संविधानमा लेखेको कुरा लागू नगर्ने अनि नलेखिएको समाजवादी क्रान्तिको कुरा गर्ने प्रवृत्तिले नै आजको अस्थिरता निम्त्याएको हो,’ उनले भने ।
उनले हालको आर्थिक मोडललाई पुरानो र अव्यवहारिक भन्दै यसको पूर्ण पुनर्संरचना आवश्यक रहेको बताए।
‘अब हाम्रो पार्टीले उत्पादनमा आधारित जीवनशैली सुरु गर्नुपर्छ। हरेक नेता र कार्यकर्ताले कुनै न कुनै उत्पादन क्षेत्रमा संलग्न भएर महिनामा सात दिन वा वर्षमा एक महिना श्रम गर्नुपर्छ। त्यसको ज्यालाबाट आफ्नो परिवारको खर्च चलाउनुपर्छ,’ उनले भने।
उनले यस्तो अभ्यासले पार्टीको आर्थिक आत्मनिर्भरता र जनसंगठन विस्तारमा क्रान्तिकारी परिवर्तन ल्याउने विश्वास व्यक्त गरे। उनले एकीकृत पार्टीको सदस्य १ करोड पुर्याउन सकिने दाबी गरे ।
‘अहिले हाम्रो पार्टीसँग १०–१२ लाख सदस्य छन्,’ उनले भने, ‘यदि हामी जनताबीच गएर उत्पादन र श्रममा आधारित पार्टी निर्माण गर्न सक्यौँ भने छ महिनामा २० लाख, एक वर्षमा ५० लाख, र अन्ततः एक करोड सदस्य पुर्याउन सकिन्छ।’
गौतमले पार्टीका आर्थिक स्रोत जनता, सदस्य र आफ्नै श्रम हुनुपर्ने उल्लेख गर्दै देशभरका ७५३ स्थानीय तहमा बजार विकास र प्रत्येक वडामा उत्पादन समूह गठन गर्ने योजना प्रस्तुत गरे ।
त्यसैगरी उनले देशमा राजनीतिक स्थिरताका लागि प्रत्यक्ष निर्वाचित राष्ट्रपतिको व्यवस्था र पूर्ण समानुपातिक निर्वाचन प्रणाली लागू गर्नुपर्ने सुझाव पनि दिए।
प्रतिक्रिया