दक्षिण चीन सागरमा अमेरिकी लडाकु विमान र हेलिकप्टर दुर्घटनाग्रस्त

एजेन्सी । अमेरिकाको जलसेनाको एउटा हेलिकप्टर र एउटा लडाकु विमान आइतबार दक्षिण चीन सागरमाथि छुट्टाछुट्टै दुर्घटनाग्रस्त भएका छन् ।

नियमित अभ्यासका क्रममा आधा घण्टाभित्रै यी दुई दुर्घटना भएका हुन् ।

दुवै विमानका चालकदलका सदस्यहरूलाई सुरक्षित रूपमा उद्धार गरिएको अमेरिकी सेनाको प्रशान्त बेडाले जनाएको छ ।

अमेरिकी जलसेनाले दुवै घटनाको कारण पत्ता लगाउन अनुसन्धान सुरु गरेको छ । यी दुर्घटनाहरू विश्वव्यापी तनावको सम्भावित केन्द्र मानिने रणनीतिक जलक्षेत्रमाथि भएका थिए ।

सामाजिक सञ्जालमार्फत अमेरिकी जलसेनाले दिएको जानकारी अनुसार, यूएसएस निमिट्ज विमानवाहक युद्धपोतबाट नियमित अभ्यास सञ्चालन गर्दै गर्दा स्थानीय समय अनुसार दिउँसो २ः४५ बजे एमएच–६०आर सीहक हेलिकप्टर दुर्घटनाग्रस्त भएको हो । खोज तथा उद्धार टोलीहरूले चालकदलका तीनैजना सदस्यलाई सुरक्षित उद्धार गरेका थिए ।

लगभग ३० मिनेटपछि त्यही निमिट्जबाट नियमित अभ्यासका क्रममा एफए–१८एफ सुपर होर्नेट लडाकु विमान पनि खसेको थियो । दुवै चालकदलले आपतकालीन रूपमा विमानबाट बाहिर निस्केर सुरक्षित उद्धार भएको जलसेनाले बताएको छ ।
एफए–१८ यो वर्ष मात्रै जलसेनाले गुमाएको कम्तीमा चौथो ६ करोड डलर बराबरको लडाकु विमान हो ।

चीन र अन्य दक्षिणपूर्वी एसियाली राष्ट्रहरूले घेरेको दक्षिण चीन सागरको केही भागमा विभिन्न देशहरूले दाबी गरेका छन् तर बेइजिङले अन्तर्राष्ट्रिय अदालतको निर्णयको उल्लंघन गर्दै लगभग सम्पूर्ण जलक्षेत्रमाथि आफ्नो स्वामित्व दाबी गरेको छ ।

गत दुई दशकमा चीनले विवादित टापु र चट्टानहरूमा सैनिक संरचना निर्माण गरेर आफ्नो दाबी मजबुत बनाएको छ । अमेरिकाले भने चीनका यी कदमहरूले उक्त समुद्री मार्गमा आवागमन र स्वतन्त्र व्यापारको स्वतन्त्रतालाई खतरा पु‍र्याएको बताउँदै आएको छ ।

अमेरिकी सेनाले उक्त क्षेत्रमा आफ्नो स्थायी उपस्थितिलाई निरन्तरता दिँदै चीनको दाबीविरुद्ध वाशिङटनका सहयोगी देशहरूलाई समर्थन गर्दै आएको छ ।

यी विमान दुर्घटनाहरू अमेरिकी राष्ट्रपति डोनल्ड ट्रम्पको एसिया भ्रमणका क्रममा भएका हुन् । ट्रम्प यसै हप्ता चीनका राष्ट्रपति सी चिनपिङसँग व्यापारमुखी वार्ताका लागि भेट्ने तयारीमा छन् ।

यसअघि वसन्त ऋतुमा लाल सागरमा अमेरिकी जलसेनाका दुई एफए–१८ विमानहरू हराएका थिए । एक विमान विमानवाहक युद्धपोतबाट समुद्रमा खसेको थियो भने अर्कोको अवतरण प्रणालीमा समस्या आएको थियो ।

अर्को विमान गत अगस्ट महिनामा भर्जिनियाको तट नजिक प्रशिक्षण उडानका क्रममा दुर्घटनाग्रस्त भएको थियो ।