भेपमा सुन तस्करी प्रकरण: पूर्वउपराष्ट्रपति पुनमाथि पनि अनुसन्धान

काठमाडौं । विद्युतीय चुरोट (भेप) मा सुन लुकाएर गरिएको तस्करी प्रकरणमा पूर्वउपराष्ट्रपति तथा नेकपा (माओवादी केन्द्र) का उपाध्यक्ष नन्दबहादुर पुन र उनका छोराहरूविरुद्ध पनि नेपाल प्रहरीले अनुसन्धान थालेको छ ।

यही प्रकरणमा माओवादी केन्द्रकै उपाध्यक्ष तथा पूर्वसभामुख कृष्णबहादुर महरा आइतबार पक्राउ परेका छन् । उनीमाथि चिनियाँ संगठित गिरोहसँग मिलेर सुन तस्करी गरेको आरोपमा प्रहरी र अख्तियार दुरुपयोग अनुसन्धान आयोग दुवैतर्फबाट अनुसन्धान भइरहेको छ ।

स्रोतका अनुसार, रोल्पाको राङ्सी घर भएका पुनमाथि पनि सोही प्रकृतिको संगठित अपराध र आपराधिक लाभको मुद्दामा अनुसन्धान अघि बढाइएको छ । नेपाल प्रहरीको केन्द्रीय अनुसन्धान ब्युरो (सीआइबी) ले पुनसँगै उनका छोराहरू र सहयोगीहरूमाथि पनि छानबिन गरिरहेको पुष्टि गरेको छ ।

पूर्वउपराष्ट्रपति पुनका जेठा छोरा जितेन्द्रले दुई वर्षअघि हुम्लाबासी भएको कागजात बनाएर गृह मन्त्रालयबाट सीमा वारपार गर्ने परिचयपत्र तयार पारेका थिए । त्यसपछि उनले हुम्ला हुँदै चीनको ताक्लाकोट पुगेर चिनियाँ टोलीसँग तमसुक गरेर करिब ४ किलो सुन बुझेका थिए । सुनको भुक्तानीबाफतको रकम नदिएपछि सो प्रकरण सार्वजनिक भएको थियो । जितेन्द्र हाल अमेरिकामा रहेको बताइएको छ ।

पुनका कान्छा छोरा दीपेश पुन पनि यसअघि सुन तस्करी, सहकारी ठगी र भुटानी शरणार्थी प्रकरणमा मुछिएका थिए । उनले २०७९ सालमा भेपमा लुकाएर ल्याइएको करिब ९ किलो सुन र २०८० सालमा हङकङबाट ब्रेक सुमा लुकाएर ल्याइएको ६१ किलो सुन तस्करी प्रकरणमा संलग्नता रहेको जाँचबुझ आयोगले उल्लेख गरेको थियो । दीपेश हाल भारतमा रहेको प्रहरी अधिकारीहरूले बताएका छन् ।

भेपमा ल्याइएको थियो ९ किलो सुन, चिनियाँसँग महराको ११ पटक फोन सम्पर्क

त्यसैगरी, पुन उपराष्ट्रपति छँदा सचिवालयमा कार्यरत उनका सल्लाहकार जीवनकुमार गुरुङ १९ मंसिर २०८० मा त्रिभुवन विमानस्थलमा बरामद १४ केजी सुन प्रकरणमा पक्राउ परे पनि पछि धरौटीमा रिहा भएका थिए ।

पुनको आफन्त अमला रोका समेत सुन तस्करी प्रकरणमा जोडिएकी थिइन् । ठमेलस्थित ‘होटल भियना’ सञ्चालन गर्ने रोकालाई गत असारमा दुई लाख धरौटीमा रिहा गरिएको थियो ।

संगठित अपराध निवारण ऐन, २०७० अनुसार, ‘कसैले आपराधिक समूहको लाभका लागि वा आपराधिक समूहसँग मिलेर गम्भीर अपराध गरेमा त्यसलाई संगठित अपराध मानिने’ प्रावधान छ । सोही कानुन बमोजिम पुनमाथि पनि संगठित अपराध र आपराधिक लाभसम्बन्धी मुद्दामा अनुसन्धान अघि बढाइएको प्रहरीले जनाएको छ ।

पुन सार्वजनिक पदमा रहँदा शक्तिको दुरुपयोग भएको आशंकामा अख्तियार दुरुपयोग अनुसन्धान आयोगले समेत उनीमाथि बेग्लै छानबिन गरिरहेको स्रोतको दाबी छ ।