जलाउँदै गरेको शवबाट हड्डी निकालेको घटनामा संलग्न २ जनालाई ७ दिन हिरासतमा राख्न अनुमति

काठमाडौं । पशुपति आर्यघाटमा शव दाहसंस्कार भइरहेको बेला हड्डी निकालेर बेचेको आरोपमा पक्राउ परेका दुई जनालाई सात दिन हिरासतमा राख्ने अनुमति प्रहरीले पाएको छ ।

जिल्ला प्रशासन कार्यालय काठमाडौंको आदेशपछि काभ्रेका ६१ वर्षीय जीवनाथ ढकाल र उदयपुरका २४ वर्षीय विनायक मैनालीविरुद्ध अभद्र व्यवहारको कसूरमा अनुसन्धान भइरहेको छ ।

उनीहरूले शुक्रबार दिउँसो चितामा जलिरहेको शवबाट हड्डी निकालेर ५ सय रुपैयाँमा बिक्री गरेको आरोप छ ।

हड्डी किनेको भनिएका व्यक्ति भने अझै फेला परेका छैनन् र यसको प्रयोजन पनि खुल्न बाँकी छ । प्रहरीले घटनाबारे अनुसन्धान भइरहेको जनाएको छ ।