लगानी गर्न नसकेपछि बैंकहरुले राष्ट्र बैंकमा राखे ६ खर्ब रूपैयाँ, थप ४० अर्ब बोलकबोल हुँदै

काठमाडौं । बैंकहरुले कर्जा लगानी गर्न नसकेपछि करिब ६ खर्ब रुपैयाँभन्दा धेरै रकम खिचेको राष्ट्र बैंकले बैंकिङ प्रणालीबाट थप ४० अर्ब रुपैयाँ तान्ने भएको छ ।

बुधबार निक्षेप संकलन उपकरण बोलकबोलमार्फत ६३ दिनको लागि केन्द्रीय बैंकले ४० अर्ब रुपैयाँ प्रशोचन गर्ने भएको हो । बैंकिङ प्रणालीमा अधिक तरलता भएपछि आर्थिक वर्षको सुरुबाट नै लगातार तरलता खिचिरहेको केन्द्रीय बैंकले आर्थिक वर्षको अन्त्यतिर आउँदा लामो अवधिको लागि तरलता खिच्न लागेको हो ।

पछिल्लो ४ पटकमध्ये ३ पटक ६३ दिनको र एकपटक ४२ दिनको निक्षेप संकलन उपकरण बोलकबोल गरेको केन्द्रीय बैंकले आइतबार भने ६३ दिनकै लागि निक्षेप संकलन उपकरण बोलकबोल गर्ने भएको हो ।

सामान्यतया २१ दिनको निक्षेप संकलन उपकरण बोलकबोल गरिरहेको केन्द्रीय बैंकले पछिल्लो समय भने ४२ दिन र ६३ दिनेको लागि निक्षेप संकलन उपकरण बोलकबोल गरिरहेको छ ।

सामान्य अवस्थामा एक साताको लागि तरलता प्रशोचन गर्ने औजार प्रयोग गर्ने गरेकामा लगातार अधिक तरलताको दबाब हुँदा केन्द्रीय बैंकले तरलता व्यवस्थापन गर्न २१ दिनको लागि निक्षेप संकलन बोलकबोल गरिरहेको थियो ।

तर, २१ दिनको निक्षेप संकलन बोलकबोलले पनि तरलता व्यवस्थापन गर्न नसक्ने भएपछि केन्द्रीय बैंकले ४२ दिन र ६३ दिनको लागि निक्षेप संकलन बोलकबोल सुरु गरेको हो ।

असार ११ मा ६३ दिनको ५० अर्ब रुपैयाँ र १५ असारमा ६३ दिनको ३० अर्ब रुपैयाँको, १८ असारमा पनि ६३ दिनको ६० अर्ब रूपैयाँको तथा २२ असारमा ४२ दिनको ४५ अर्ब रूपैयाँको निक्षेप संकलन उपकरण बोलकबोल भएको थियो ।

निक्षेप संकलन उपकरणको ब्याजदर बोलकबोलबाट तय हुने केन्द्रीय बैंकले जनाएको छ । राष्ट्र बैंकले चालु आर्थिक वर्षको मौद्रिक नीतिमा औसत अन्तरबैंक ब्याजदर नीतिगत दरको करिब राख्ने लक्ष्य लिएको थियो । तर, लगातार अधिक तरलता हुँदा नियमित तरलता प्रशोचन गरे पनि उक्त लक्ष्य पूरा हुन सकेको छैन ।

यद्यपि, ब्याजदर करिडोरको तल्लो सीमाको रुपमा रहेको फ्लोर रेट (निक्षेप संकलन दर) को करिब भने राखेको छ । केन्द्रीय बैंकले फ्लोर रेटमा स्थायी निक्षेप सुविधा पनि उपलब्ध गराउँदै आएकोले अन्तरबैंक ब्याजदर पनि सोही हाराहारी रहेको देखिन्छ ।

राष्ट्र बैंकको २३ असारको तथ्यांकअनुसार बैंकहरुमा बढी भएर खिचेको तरलता रकम केन्द्रीय बैंकमा ५ खर्ब ८० अर्ब ८५ करोड रुपैयाँ मौज्दात छ । जसमध्ये निक्षेप संकलन बोलकबोल मार्फत ३ खर्ब ४५ अर्ब ४५ करोड र स्थायी निक्षेप सुविधामार्फत २ खर्ब ३५ अर्ब ४० करोड तरलता प्रशोचन भएको हो ।