काठमाडौं । दुई भारतीय वायुसेवाले नेपालमा नियमित उडान गर्ने भएका छन् । ६ वर्षपछि कमब्याक गर्दै गरेको स्पाइसजेटसहित एयर इण्डिया एक्सप्रेसले पहिलोपटक नेपाल उडान गर्ने भएको छ । यी दुई वायुसेवाको नेपाल उडानको लागि सेड्युल स्वीकृत हुनुका साथै स्लटसमेत पाइसकेको त्रिभुवन अन्तर्राष्ट्रिय विमानस्थलका महाप्रवन्धक जगन्नाथ निरौलाले जानकारी दिए ।
उनका अनुसार स्पाइसजेटले हप्तामा सातै दिन उडान गर्ने छ भने एयर इण्डिया एक्सप्रेसले दिनको २ वटा उडान गर्ने गरी सेड्युल स्वीकृत गराएको छ । यी दुई वायुसेवा दिउँसो काठमाडौं विमानस्थलमा आउने भएका छन् ।
भारतीय सस्तो भाडादरको वायुसेवा मानिने स्पाइसजेट कोरोना अगाडि नेपालमा नियमित उडान गर्दै आएको थियो । यसले भारतको दिल्लीबाट काठमाडौं उडान गर्ने भएको छ ।
यही समर सिजनबाट उडान सुरु गर्न लागेको यी दुई वायुसेवासँगै भारतबाट नेपाल आउने उडान र यात्रुसेवा थप सहज हुने भएको छ । हाल भारतबाट एयर इण्डियाको उडान दैनिक ७ वटा हुने भएको छ, इण्डिगो एयरले देनिक तीनवटा उडान गर्ने गरेको छ । नयाँ दुई वायुसेवासँगै भारतबाट नियमित उडान गर्ने वायुसेवा ४ वटा हुने छ ।
चैत १९(आज) देखि त्रिभुवन अन्तर्राष्ट्रिय विमानस्थल धावनमार्ग मर्मतका क्रममा नरोकिने भएको छ । आजबाट धावनमार्ग बन्द नहुने भएकोले हिजोभन्दा आजबाट हुने उडान पनि बढेको छ।
उनका अनुसार यस अघि धावनमार्ग बन्द गरेर मर्मत हुँदै आएको ट्याक्सीवेको मर्मत अब अप्रिल १ (आजदेखि) भने उडान अवतरण नरोकि नै हुने भएको छ ।
अप्रिलदेखि समर सेड्युल सुरु भएसँगै विहान ६ बजेदेखि राति १२ बजेसम्म विमानस्थल चल्ने भएको छ । अब दैनिक १८ घण्टा विमानस्थल सञ्चालन हुने छ । यसअघि विहान ३ बजेसम्म नै उडान हुने थियो । अब १२ बजेसम्म विमानस्थल खुल्ने भएकोले त्यसपछिको उडानलाई तीन घण्टा अगाडि नै व्यवस्थापन मिलाउन सकिएको त्रिभुवन अन्तर्राष्ट्रिय विमानस्थल कार्यालयले जानकारी दिएको छ ।
ट्याक्सी वेको सबै काम सकिन डेढ २ वर्ष नै लाग्ने भए पनि उडान अवतरण रोकेर गर्नु पर्देन । समर सेड्युलसँगै गत वर्षको भन्दा यो वर्ष धेरै उडान हुने भएको छ ।
सातामा ४ वटा उडान गर्दै आएको क्याथे प्यासिफिकसले पनि हप्तामा सातै दिन उडान गर्ने तालिका पनि आजदेखिको सेड्युलमा उल्लेख छ ।
प्रतिक्रिया