अमेरिकामा टेस्ला गाडीमा किन भइरहेको आक्रमण ?

एजेन्सी । साइबरट्रकहरू आगो लगाइयो । गोली र मोलोटोभ ककटेल टेस्लाका सोरुमहरूमा प्रहार गरियो ।

एलन मस्कको इलेक्ट्रिक कार कम्पनी टेस्लाको लोगो भएका सम्पत्तिहरूमा आक्रमणहरू अमेरिका र विदेशका विभिन्न स्थानहरूमा देखिएका छन् । हालसम्म कसैलाई चोटपटक लागेको छैन तर टेस्लाका सोरुमहरू सवारी साधन पार्किङ स्थल, चार्जिङ स्टेसनहरू र निजी रूपमा स्वामित्वमा रहेका कारहरू लक्षित भएका छन् ।

डोनाल्ड ट्रम्प पुनः राष्ट्रपति भएपछि र उनले एलन मस्कलाई नयाँ ‘सरकारी दक्षता विभाग’ को नेतृत्व गर्न जिम्मेवारी दिएपछि यी घटनाहरू तीव्र रूपमा बढेका छन् । यस विभागले सरकारी खर्च कटौती गरिरहेको छ । घरेलु उग्रपन्थ अध्ययन गर्ने विशेषज्ञहरू यी घटनाहरू लामो समयसम्म चल्ने निश्चित नभएको बताउँछन् ।

ट्रम्पको पहिलो कार्यकालमा उनको न्यूयोर्क, वासिङ्टन र अन्य स्थानका सम्पत्तिहरू प्रदर्शनका केन्द्र बनेका थिए । दोस्रो कार्यकालको सुरुवाती दिनहरूमा टेस्ला त्यस्तो नयाँ लक्ष्य बनेको छ ।

‘टेस्ला आक्रमण गर्न सजिलो लक्ष्य हो,’ राजनीतिक हिंसा अध्ययन गर्ने समाजशास्त्री र्यान्डी ब्लाजाक भन्छन्, ‘टेस्लाका गाडीहरू हाम्रा सडकहरूमा गुड्छन् । टेस्लाका सोरुमहरू हाम्रो छिमेकमै छन् ।’

तर यी आक्रमणहरूले कानुनी निकायहरूलाई व्यस्त बनाइरहेको छ ।

कोलोराडोमा एक महिलालाई गत महिना टेस्लाका सोरुमहरूमा मोलोटोभ ककटेल प्रहार गर्ने, गाडीहरूमा आगो लगाउने र भवनमा ‘नाजी कार’ लेख्ने आरोपमा मुद्दा दायर गरिएको छ ।

साउथ क्यारोलिनामा संघीय एजेन्टहरूले गत हप्ता एकजनालाई पक्राउ गरे, जसले चार्जिङ स्टेशनहरूमा आगो लगाएको आरोप छ । अनुसन्धान अधिकारीहरूले उनको कोठा र वालेटमा सरकार तथा ‘सरकारी दक्षता विभाग’ विरोधी लेखिएका कागजहरू फेला पारेका थिए।

सबैभन्दा धेरै घटनाहरू वामपन्थी सोच राख्ने उत्तर-पश्चिमी सहरहरू विशेष गरी ओरेगनको पोर्टल्यान्ड र सिएटलमा देखिएका छन् जहाँ ट्रम्प र मस्कविरुद्ध ठूलो असन्तुष्टि छ ।

ओरेगनमा एक व्यक्तिलाई टेस्ला स्टोरमा मोलोटोभ ककटेल प्रहार गरेको आरोप लागेको छ । त्यसपछि उनले अर्को दिन फर्केर सोरुमको झ्यालमा गोली प्रहार गरेको बताइएको छ । पोर्टल्यान्डको उपनगर टाइगर्डमा गत हप्तामात्रै टेस्ला सोरुममा १२ भन्दा बढी गोली प्रहार गरिएको थियो जसले गाडीहरू र झ्यालहरूमा क्षति पुर्यायो । यो एकै सातामा दोहोरिएको आक्रमण हो ।

सिएटलमा टेस्लाका चार साइबरट्रकहरू जलाइएका थिए । शुक्रबार एक व्यक्तिले एउटा टेस्ला मोडेल एसमा पेट्रोल खन्याएर आगो लगाएको देखिएको थियो ।

लस भेगासमा मंगलबार बिहान एक टेस्ला सेवा केन्द्र बाहिर धेरै गाडीहरू जलाइएका थिए । सोरुमको अगाडि ‘विरोध’ भन्ने शब्द रातो रंगमा लेखिएको थियो । अधिकारीहरूका अनुसार कम्तीमा एक व्यक्तिले मोलोटोभ ककटेल प्रहार गरेको र गाडीहरूमा गोली चलाएको थियो।

‘के यो आतंकवाद हो ? कि अरू केही हो ?’ लस भेगास एफबीआई प्रमुख स्पेन्सर इभान्सले भने, ‘यस घटनामा केही संकेतहरू छन् जस्तै भवनमा लेखिएको सन्देश, सम्भावित राजनीतिक उद्देश्य, हिंसात्मक कार्य । यी सबै कुरालाई हामी गम्भीर रूपमा लिन्छौं ।’

टेस्ला वामपन्थीहरूको निशानामा परेको हो ?

टेस्ला पहिले वामपन्थीहरूको प्रिय ब्रान्ड थियो । ओबामा प्रशासनको समयमा ४६५ मिलियन डलरको सरकारी ऋण सहयोगबाट कम्पनीलाई उभ्याइएको थियो । टेस्लाले इलेक्ट्रिक गाडीहरू लोकप्रिय बनायो र प्रमाणित गर्‍यो कि यस्ता गाडीहरू कमजोर, छोटो दायरा भएका मात्र हुँदैनन् ।

तर हालसालै मस्क दक्षिणपन्थी विचारधारासँग जोडिएका छन् । उनले सामाजिक सञ्जाल ट्विटर किनेर यसको नाम ‘एक्स’ राखे र पहिले वामपन्थीहरूलाई मनपर्ने सामग्री नियन्त्रण हटाए। उनले ट्रम्पको २०२४ को चुनावी अभियानलाई २५० मिलियनभन्दा बढी सहयोग गरे जसले उनलाई ट्रम्पको सबैभन्दा ठूलो दाता बनायो।

मस्क अहिले पनि टेस्ला, एक्स र अन्तरिक्षयान निर्माता स्पेसएक्स सञ्चालन गर्छन्, साथै ट्रम्पलाई सल्लाह दिने भूमिकामा छन् ।

ट्रम्प पुनः निर्वाचित भएपछिको केही सातामै टेस्लाको शेयर मूल्य दोब्बर भएको थियो तर त्यसयता ती सबै लाभ गुमिसकेको छ।

ट्रम्पले ह्वाइट हाउसको अगाडि टेस्ला गाडीहरू प्रदर्शन गराएका थिए । उनले टेस्लाको प्रवर्द्धन गर्दै आफू ८० हजार डलर पर्ने टेस्ला मोडेल एस किन्ने बताएका थिए, जबकि पहिले उनी इलेक्ट्रिक गाडीहरूको कट्टर आलोचक थिए।

मस्कले सोमबार सिनेटर टेड क्रूजको पोडकास्टमा ‘कम्तीमा केही आक्रमणहरू संगठित र वित्तीय रूपमा समर्थन गरिएको’ बताएका छन् ।

‘यो हिंसा अस्वाभाविक रूपमा बढेको छ र गलत छ,’ उनले एक्समा लेखे।

व्हाइट हाउसले मस्कको समर्थन गर्दै टेस्ला तोडफोडलाई ‘घरेलु आतंकवाद’ भनेको छ । ट्रम्पले धम्की दिँदै भनेका छन्, ‘जो कोही टेस्लालाई निसाना बनाउँछ, तिनीहरू नरकबाट गुज्रिनेछन् ।’

अटर्नी जनरल पाम बोन्डीले अनुसन्धान सुरु गरेको बताएकी छन् ।

‘यदि तपाईं टेस्लालाई तोडफोड गर्न खोज्दै हुनुहुन्छ भने तपाईं सावधान हुनुस्, किनभने हामी तपाईंको पछि लाग्नेछौं,’ उनले भनेकी छन् ।

विशेषज्ञ कोलिन क्लार्कका अनुसार वामपन्थी राजनीतिक हिंसाले प्रायः सम्पत्ति लक्षित गर्छ, मानिसहरू होइन । उनले भने, ‘यो अहिलेको मुख्य खतरा होइन । अन्य धेरै गम्भीर खतरा छन् ।’

टेस्ला ओनर्स क्लबकी अध्यक्ष थेरेसा राम्सडेल भन्छिन्, ‘एलन वा ट्रम्पलाई मन नपराउनु तपाईंको कुरा हो। तर त्यसका लागि कसैको सम्पत्ति तोडफोड गर्न, जलाउन उचित होइन ।’

उनको साइबरट्रकमा कसैले ‘नो एलन’ स्टिकर टाँसेका थिए तर उनले टेस्ला चलाउन नछाड्ने बताइन् ।

‘म मेरो कार मन पराउँछु । यो सुरक्षित छ,’ उनले भनिन्, ‘अरूको विचारका कारण म गाडी चलाउन छोड्ने छैन ।’