बैंकको ताला फुटाएर चोरी गर्न भित्र छिरेका एक युवक पक्राउ

दाङ । दाङको तुलसीपुरस्थित एक बैंकको शाखा कार्यालयमा चोरी प्रयास गर्ने युवक पक्राउ परेका छन् । पक्राउ पर्नेमा तुलसीपुर उपमहानगरपालिका–१८ दुधरास निवासी २७ वर्षीय सन्तोष चौधरी रहेका छन् ।

तुलसीपुर प्रहरीका अनुसार चौधरीलाई आइतबार बिहान २ बजे तुलसीपुर उपमहानगरपालिका–५, बिपी चोकस्थित एनएमबी बैंकको शाखाभित्रैबाट पक्राउ गरिएको हो ।

बैंकमा मध्यरातमा एक व्यक्ति प्रवेश गरेको जानकारी प्राप्त भएपछि इलाका प्रहरी कार्यालय तुलसीपुरबाट टोली खटिएको थियो।

चौधरी बैंकको ताला फुटाएरभित्र प्रवेश गरेको प्रहरीले जनाएको छ । बैंकभित्र छिरेका उनको साथबाट हथौडा, छिनो, ह्याक्सो लगायतका उपकरणहरू फेला परेको प्रहरीले जनाएको छ । उनी स्कुटर चढेर गएका थिए । उनले प्रयोग गरेको रा ५ प ९७९ नम्बरको स्कुटर पनि प्रहरीले नियन्त्रणमा लिएको छ।
बैंकमा रातिको समयमा सुरक्षा गार्ड नराखिएकाले चौधरीले त्यसको फाइदा उठाउन खोजेको तुलसीपुर प्रहरीले जनाएको छ ।