कारबाही फिर्ता गरे एमालेमा फर्कनुहुन्छ भन्ने प्रश्नमा भीम रावलको यस्तो जवाफ

काठमाडौं । नेकपा एमालेले पार्टीबाट निष्कासन गरेपछि उक्त पार्टीका पूर्वउपाध्यक्ष भीम रावलले बुधबार पत्रकार सम्मेलन गरे।

दुई घण्टाभन्दा लामो सम्बोधन गरेका रावलले आफूलाई पार्टीबाट निकालिएको भन्दै उक्त दलका अध्यक्ष केपी शर्मा ओलीको चर्को आलोचना गर्दै गम्भीर प्रश्नहरुको वर्षा गरे ।

आधा दशक मिहेनत र त्याग गरेको पार्टीबाट निकालिएको भन्दै उनको आक्रोश देख्न सकिन्थ्यो । विशेषगरि उनी एमालेका अन्य नेता भन्दा अध्यक्ष ओली र उनी निकटकासँग क्रुद्ध देखिएका थिए ।

पार्टीको घोषणा गर्ने भन्दै प्रचार गरिएको भए पनि रावलले पार्टीको घोषणा भने गरेनन् । उनले सम्बोधनको अन्तिमतिर अबको बाटो भन्दै मातृभूमि जागरण अभियान सञ्चालन गर्ने घोषणा गरे र राष्ट्रवादीहरु एक ठाउँमा भेला हुनु पर्ने बताए ।

त्यसपछि पत्रकारहरुलाई प्रश्न गर्न अनुमति दिएका उनलाई नेकपा एमालेले गरेको कारबाही पुनरावलोकन गरे एमालेमा फिर्ता हुनुहुन्छ भन्दै प्रश्न गरे ।

रावलले आफ्नो गाउँतिर प्रचलित कथा भन्दै त्यसको जवाफ दिए र कार्यक्रमस्थलबाट हिँडे ।

रावलले सुनाएको कथा

चेलीको विहेपछि धेरै टाँढा पठाउने चलन हुन्थ्यो । खोता तरेर जानुपर्थ्यो तर पुल हुँदैन थियो । बुबाआमा भेट्न नपाएर घरमा छोरी धेरै रुन्थिन् भने यता आमाबुबा छोरी भेट्न नपाएर धेरै रुन्थे रे । छोरीले सोध्थिन् रे बुबाआमा म कहिले फर्कन्छु ?

बुबा आमाले सल्लाह गर्थे-यसलाई त आशामा बच्न दिनुपर्छ

छोरी जहिले त्यो लेकको उन्यू फूल्छ, त्यहीँ दिन तँलाईं बोलाउला ।

तर, न लेकको उन्यू फूल्यो न बाबुआमाले बोलाए !

पार्टी किन खोलेनन् ?

ओलिविरुद्ध खनिएका रावलले आज नयाँ पार्टीको घोषणा गर्ने भन्दै चर्चा भइरहे पनि उनले पार्टीको घोषणा भने गरेका छन् ।

तर उनले सम्बोधनको अन्तिममा उनले मातृभूमि जागरण अभियान सञ्चालन गर्ने घोषणा गरे र राष्ट्रवादीहरु एक ठाउँमा भेला हुनु पर्ने बताए ।

उनले विभिन्न राजनीतिक दल, व्यक्ति र समूहसँग मिलेर आफू अघि बढ्ने उनले बताए । त्यसक्रममा उनले नेपाली कांग्रेस विपीको नाम भने लिए । केही दिनअघि उनले उक्त समूहका नेतासँग छलफल गरेको समाचार बाहिरिएका थिए ।

पत्रकारको प्रश्नमा उनले बालेन शाह, हर्क साम्पाङ, दुर्गा प्रसाईं, रवि लामिछाने मात्र नभइ अन्य व्यक्ति तथा पार्टी मुद्दा मिल्नेसँग मिलेर अघि बढ्न सक्ने बताए ।

उनको पत्रकार सम्मेलन नयाँ पार्टीको घोषणाभन्दा पनि आफूलाई पार्टीबाट निष्कासन गरेको भन्दै एमाले र त्यसका अध्यक्ष ओलीविरुद्ध आरोप लगाए । उनले एमाले अध्यक्षले आफ्ना प्रश्नहरुको जवाफ दिनुपर्ने बताए ।

एमालेले कारबाही फिर्ता गरे तपाईं फर्किनुहुन्छ भन्ने पत्रकारको प्रश्नमा एक कथा सुनाउँदै उनले भने ‘न लेकको उन्यू फुल्यो न बाबुआमाले चेलीलाई बोलाए ।’

ओलीमाथि प्रश्नै प्रश्न

रावलले पार्टी अध्यक्ष तथा प्रधानमन्त्री केपी शर्मा ओलीलाई आफ्नो निष्कासनको विषयमा कडा प्रतिवाद गरे । बुधबार आयोजित पत्रकार सम्मेलनमा रावलले आफूलाई दसौँ महाधिवेशनमा अध्यक्ष पदमा उठेको भन्दै प्रश्न गरेको ओलीको भनाइप्रति गम्भीर असन्तुष्टि व्यक्त गरे ।

रावलले भने, ‘मलाई अध्यक्ष पदमा किन उठेको भनेर प्रश्न गर्दा प्रतिप्रश्न गर्न मन लाग्यो— के तपाईंले पनि आठौँ महाधिवेशनमा झलनाथ खनाल र नवौँ महाधिवेशनमा माधवकुमार नेपालसँग प्रतिस्पर्धा गर्नुभएको होइन?’

उनले थपे, ‘के कुनै विशेष ठाउँमा जन्मेको, कुनै थर भएको, वा अरू कुनै कारणले मात्र अध्यक्ष पदमा उठ्न पाइन्छ? पार्टीभित्र सुशासन, पारदर्शिता, र लोकतान्त्रिक मान्यताका आधारमा प्रतिस्पर्धा गर्नु अपराध हो?’

भीम रावलले आफ्नो ५१ वर्षे राजनीतिक योगदानलाई बेवास्ता गर्दै पार्टीबाट निष्कासन गर्नु अन्यायपूर्ण भएको बताए । उनले एमाले नेतृत्वले पार्टी सदस्यसमेत नरहने गरी गरिएको कारबाहीलाई गुटबन्दी र अधिनायकवादी मानसिकताको परिणाम भने।

‘मलाई महाधिवेशनमा अध्यक्षमा उठेको कारण कारबाही गर्ने ओलीले भ्रष्टाचार, दलाली, र अनैतिक काममा संलग्नहरूसँग साँठगाँठ गरेर सुशासन र समाजवादको कुरा गर्नु पत्याउन नसकिने अवस्था छ,’ रावलले भने।

रावलले ओलीसँग संवादका लागि पटक-पटक प्रयास गरे पनि ओलीले समय नदिएको गुनासो गरे। उनले ओलीले आफ्नो बारेमा ‘भीम रावलले कुरा गर्न चाहँदैन’ भन्ने कुप्रचार गरेको दाबीसमेत गरे।

‘पार्टीभित्रै छलफल र सहमति खोज्ने मेरो प्रयासलाई नजरअन्दाज गर्दै पार्टीलाई गुटबन्दीमार्फत चलाइएको छ,’ उनले भने।

रावलले पार्टीभित्र गुटबन्दी चलाएर जनताको हितमा काम गर्नेलाई निषेध गर्ने र प्रतिनिधिसभा चुनावमा टिकटसमेत नदिने ओलीको शैली जवजको सिद्धान्तविपरीत भएको बताए ।

‘जनताको पक्षमा उभिएका नेताहरूलाई पन्छाएर पार्टीलाई व्यक्तिगत स्वार्थका लागि प्रयोग गर्नु देशको लोकतन्त्र र पार्टीका मूल्यमान्यतामाथि प्रहार हो,’ उनले भने ।

उनले ओलीको ‘मिसन ०८४’ लाई ‘मिसन पतन’मा परिणत हुने चेतावनीसमेत दिए । उनले थपे, ‘यदि यी प्रश्नहरूको उत्तर दिन नसक्ने हो भने आगामी निर्वाचनमा एमालेको पतन हुनेछ ।’

रावलले महाधिवेशनका क्रममा आफ्ना समर्थक प्रतिनिधिहरूलाई धम्की दिएको, मतदानमा अवरोध पुर्‍याएको, र सदस्यता खारेज गर्ने निर्णय विधिसम्मत नभएको दाबी गरे । साथै, उनले प्रतिनिधिहरूलाई दुई दिनसम्म अलपत्र पार्ने र एक-एक गरेर धम्क्याउने ओलीको शैलीप्रति कटाक्ष गर्दै प्रश्न गरे, ‘चुन्ने र चुनिने अधिकारको प्रयोग गर्नु गलत हो ?’