अजरबैजान एयरलाइन्स दुर्घटनामा रुसी राष्ट्रपति पुटिनले किन मागे माफी ?

एजेन्सी । रुसका राष्ट्रपति भ्लादिमिर पुटिनले चेचन्याको ग्रोज्नीतर्फ उडान भरेको अजरबैजान एयरलाइन्सको विमान रुसको हवाई क्षेत्रमा प्रवेश गरेपछि दुर्घटना भएको भन्दै माफी मागरेका छन् ।

पुटिनले माफी मागे पनि त्यसमा रुसको कुनै हात नरहेको बताएका छन् । अमेरिकाले अजरबैजान एयरलाइन्स विमान दुर्घटनामा रुसी हात रहेको आरोप लगाइरहँदा पुटिनले माफी मागरेका हुन् ।

रुसी राष्ट्रपति कार्यलयका अनुसार विमानले ग्रोज्नीमा अवतरण गर्न खोज्दा रुसको वायु रक्षा प्रणाली सक्रिय रहेको पुटिनले बताएका छन् ।

अजरबैजानका राष्ट्रपति इल्हाम अलीयेभसँग फोन वार्तामा उनले माफी मागेका हुन् । ‘रुसी हवाई क्षेत्रमा भएको दुःखद घटनाको लागि माफी चाहन्छु । विमानले बारम्बार ग्रोज्नीको एयरपोर्टमा अवतरण गर्ने प्रयास गरेको थियो । एकै समयमा ग्रोज्नी, मोजडोक र भ्लादिकाभकाजका क्षेत्रहरुका युक्रेनी सेनाको ड्रोनद्धारा आक्रमण गरिएको थियो । त्यसैले रुसको वायू रक्षा प्रणालीमा असर परेको थियो,’ राष्ट्रपति कार्यालयले जारी गरेको एक विज्ञप्तिमा भनिएको छ ।

विमानस्थलमा पुग्न नसकेपछि विमान पूर्व दिशातर्फ मोडिएर कजाकिस्तानको अकताउ नजिकै दुर्घटनाग्रस्त हुँदा ३८ जनाको मृत्यु भएको थियो । विमानमा अजरबैजान, रुस, काजाकिस्तान र किर्गिस्तानका मानिस सवार थिए । बाँचेका मध्ये दुई बालबालिका पनि थिए ।