काभ्रेमा आग्लोले हानी आमाको हत्या, सुन र पैसा लिएर भागेका छोरा पक्राउ

काभ्रे । काभ्रेपलाञ्चोकमा आमाको हत्या गरेको अभियोगमा छोरा पक्राउ परेका छन् । २८ वर्षीय फुर्सङ तामाङलाई प्रहरीले आमाको हत्या गरेको अभियोगमा पक्राउ गरि सार्वजनिक गरेको हो ।

रोशी गाउँपालिका-३ भन्ज्याङ डाँडामा कात्तिक १६ गते ६९ वर्षीया माइली तामाङको हत्या भएको थियो । माइलीको हत्यापछि फुर्सङले सुन र गरगहना लिएर भागेको काभ्रे प्रहरीका एसपी वसुन्धरा खड्काले बताइन्।

प्रहरीका अनुसार फुर्साङले भान्सा कोठामा सुतिरहेकी आमालाई मसला पिस्ने लोहोरोले टाउकोमा प्रहार गरेका थिए । लोहोरो प्रहारपछि अचेत अवस्थामा रहेकी आमालाई उनले ढोकाको आग्लोले प्रहार गरि हत्या गरेको प्रहरीले जनाएको छ ।

आमाको हत्यापछि उनी सुनको रिङ र साथमा रहेको नगद समेत लिई भागेका थिए।

छोराको साथबाट ९ हजार नगद र सुन बरामद गरिएको प्रहरीले जनाएको छ।

उनलाई कात्तिक १८ गते पक्राउ गरी जिल्ला अदालतबाट ७ दिन म्याद थप गरेर अनुसन्धान गरिरहेको एसपी खड्काले जनानकारी दिइन् ।