लगानी सम्मेलनको ड्रिम प्रोजेक्ट ‘रारा रिसोर्ट’को आईईई स्वीकृति, २ अर्ब लगानी हुने

काठमाडौं । सरकारले गत वैशाखमा आयोजना गरेको लगानी सम्मेलनमा सम्झौता भएको ड्रिम प्रोजेक्ट मानिएको रारा रिसोर्ट निर्माणको प्रक्रिया अघि बढ्ने भएको छ । अष्ट्रेलियन लगानीमा मुगुको रारा क्षेत्रमा निर्माण हुन लागेको सुविधासम्पन्न रिसोर्ट खोल्नका लागि नेपाल सरकारले प्रारम्भिक अध्ययन अनुमति (आईईई)काे अनुमति दिएसँगै निर्माण प्रक्रिया अघि बढेको हो ।

उक्त रिसोर्ट निर्माणका लागि पर्यटन मन्त्रालय अन्तर्गतकाे विभागलेसमेत स्वीकृति प्रदान गरेको छ । विभागले रारा क्षेत्रमा १९ वटा भवनमा ६२ कोठा र ९८ शैथ्या क्षमता रहने गरी लक्जरी रिसोर्ट निर्माणका लागि सोमबार आईईई गर्न अनुमति प्रदान गरेको हो ।

अष्ट्रेलियाको एक्सपर्ट ग्रुप र नेपालको रारा होल्डिङ्स रिसोर्ट प्रालिको संयुक्त लगानीमा बन्न लागेको उक्त होटलको लागत करिब २ अर्ब रुपैयाँ रहनेछ । अष्ट्रेलियाका एक्सपर्ट ग्रुपको मूख्य लगानी रहने उक्त रिसोर्टमा नेपाली साझेदारका रुपमा रारा होल्डिङ्सका तर्फबाट अभिषेकविक्रम शाहले नेतृत्व गर्नेछन् ।

उक्त रिसोर्ट मुगु जिल्लाको छाँयानाथ रारा नगरपालिका वडा नं ९, मुर्माटपमा ८० रोपनी क्षेत्रफलमा बन्न लागेको हो । डेढ वर्षभित्र निर्माण सम्पन्न गरिसक्ने लक्ष्य राखिएको रिसोर्ट स्थानीय स्रोतसाधनको प्रयोग र त्यहाँको संस्कृति झल्किने गरी निर्माण गर्न विस्तृत परियोजना प्रतिवेदन तयार भएको संचालक शाहले बताए ।

‘भर्खरै मात्र पर्यटन विभागले रिसोर्ट निर्माणका लागि आईईई स्वीकृति प्रदान गरेको छ,’ शाहले भने, ‘अब केही समयभित्रै अन्य थप प्रक्रिया पुरा गरी निर्माण चरणमा प्रवेश गर्नेछौं ।’ साथै उक्त रिसोर्ट निर्माणसँगै रारा क्षेत्र विकासको लागि कोशेढुंगा सावित हुने स्थानीय सरोकारवालाहरु बताउँछन् ।