महालक्ष्मी विकास बैंकले पायो आईएसओ प्रमाणपत्र

काठमाडौं । महालक्ष्मी विकास बैंक अब अन्तराष्ट्रिय स्तरमा मान्यता प्राप्त आईएसओ 9001: 2015   बाट प्रमाणित भएको कम्पनी बनेको छ ।

गुणस्तर व्यवस्थापन प्रणालीमा अन्तराष्ट्रिय स्तरको गुणस्तरीय सेवा प्रदान गर्न अब्बल भएपछि गत साउन ३२ गतेदेखि उक्त बैंक आईएसओबाट प्रमाणित भएको हो ।

अन्तराष्ट्रिय मापदण्ड अनुरुपको बलियो गुणस्तर ब्यवस्थापन प्रणाली कायम गर्नुका साथै उत्कृष्ट सेवा प्रदान गर्न सक्ने, ग्राहक सन्तुष्टीलाई सुनिश्चितता गर्न सक्ने तथा आफ्नो कार्य प्रणालीलाई निरन्तर रुपमा सुधार गर्न सक्ने संस्थाले मात्र यस्तो प्रमाणपत्र प्राप्त गर्न योग्य हुन्छन् ।

यो प्रमाण पत्र प्राप्त गर्नुअघि समग्र व्यवस्थापन प्रणालीको जाँच तथा विस्तृत अडिट अमेरिकास्थित रोयल इम्प्याक्ट लिमिटेडले गरेको थियो ।

बैंकको २२ औ वार्षिक साधारण सभाबाट विदेशी बैंक वा वित्तीय संस्थालाई रणनीतिक साझेदारको रुपमा ल्याउन प्रस्ताव समेत पारित भएको छ ।

यो बैंकको देशभर १०३ शाखा कार्यालयहरु र करिब ७ लाख ग्राहकहरु रहेका छन् ।