सहकारी ठगी प्रकरणः छानबिन समितिको टिओआर टुंग्याउन कार्यदलको बैठक, रविमाथि छानबिन होला ?

काठमाडौं । सहकारी ठगीका विषयमा छानबिन समितिको कार्यादेश टुंगो लगाउन गठित कार्यदलको बैठक सुरु भएको छ ।

कार्यदलको बैठक कानुन, न्याय तथा संसदीय मामिला मन्त्रालयमा बिहीबार अपराह्न बैठक सुरु भएको हो।

कार्यादेश टुंगो लगाउन कानुन, न्याय तथा संसदीय मामिलामन्त्री पदम गिरीको संयोजकत्वमा कांग्रेस सहमहामन्त्री जीवन परियार, एमाले प्रमुख सचेतक महेश बर्तौला र रास्वपाका सांसद शिशिर खनाल सदस्य रहने गरि कार्यदल बनेको थियो ।

यसअघि मंगलबार समितिको बैठक बसे पनि निर्णयमा पुग्न सकेको थिएन । आजको बैठकमा सहमति जुट्ने विश्वास नेताहरुको छ ।

गत शनिबार प्रमुख दलहरुबीच सहकारी ठगीका विषयमा अध्ययन गर्न संसदीय समिति गठनको सहमति भएको थियो ।

उपप्रधान एवं गृहमन्त्री रवि लामिछानेमाथि सहकारी ठगीमा संसदीय छानबिन हुनु पर्ने माग गर्दै कांग्रेसले संसदमा बिरोध गर्दै आएको छ ।

शनिबार समिति गठन भए पनि त्यसको कार्यादेशबारे दलहरुबीच कुरा मिल्न सकेको छैन ।

आइतबार टीओआर टुंग्याउन दलहरु छलफलमा जुटे पनि सहमति हुन सकेन । सोमबार कार्यादेश बनाउने समितिको बैठक बस्न सकेन । सोमबारै प्रधानमन्त्रीले प्रतिपक्षीको बिरोधका बाबजुद विश्वासको मत लिएका छन् ।

प्रमुख प्रतिपक्षी कांग्रेसले गृहमन्त्री लामिछानेको नामै तोकेर छानबिन समिति बनाउनु पर्ने अडान राखेको छ भने सत्तारुढ दलहरुले सूर्यदर्शन लगायतका सहकारीको नाम लेख्ने तर लामिछानेको नलेख्ने अडान लिँदा यसअघि कार्यादेशबारे सहमति जुट्न सकेको थिएन ।

समिति बनाउने सहमति भएसँगै आइतबार गृहमन्त्री लामिछानेले संसद्मा संबोधन गरिसकेका छन् । कांग्रेसले लामिछानेको नाम किटान गरेर संसदीय समिति गठनको माग आफूहरुको बटम लाइन भएको बताइरहँदा आज बैठक बसिरहेको हो ।