कानुन विपरीत संस्थापक सेयर बेच्न लागेको भोले गणेश सेयर दलाल पछि हट्यो
![](https://clickmandu.com/wp-content/uploads/2024/02/bhole-ganesh-suchana-new-768x403.png)
काठमाडौं । धितोपत्र बोर्डको कानुन विपरीत संस्थापक सेयर बिक्री गर्न लागेको भोले गणेश सेक्युरिटीज (ब्रोकर नम्बर ६१) ‘ब्याक’ भएको छ ।
सोमबार सूचना जारी गर्दै भोले गणेश सेक्युरिटिजले प्राविधिक कारणले अर्को सूचना प्रकाशित नभएसम्म संस्थापक सेयर बिक्री नगर्ने जनाएको छ ।
यो विषयमा क्लिकमान्डुले माघ २६ गते ‘कानुन विपरीत संस्थापक सेयर बेच्दै भोले गणेश सेयर दलाल’ शीर्षकको समाचार प्रकाशिन गरेको थियो । लगत्तै उक्त दलालले अर्को सूचना जारी गरेर २८ हजार ३८० कित्ता प्रमोटर सेयर तत्काल बिक्री नगर्ने जनाएको छ ।
सोमबार प्रकाशित सूचनामा ‘मिति २०८०-०९-१८ गते बुधबार र मिति २०८०-१०-२६ गते शुक्रबार यस भोले गणेश सेक्युरिटिज् लिको मध्यान्ह दैनिकमा प्रकाशित संस्थापक सेयर बिक्रीसम्बन्धी सूचना प्रकाशित गरेकोमा उल्लेखित संस्थापक सेयर बिक्री कारोवार प्राविधिक कारणले अर्को सूचना प्रकाशित नहुन्जेलसम्म स्थगित गरिएको व्यहोरा सम्बन्धित सम्पुर्ण संस्थापक सेयर धनि तथा नियामक निकायहरुको जानकारीको लागि यो सूचना प्रकाशित गरिएको छ’ उल्लेख छ ।
धितोपत्र दलाल व्यवसायी भोले गणेश सेक्युरिटीजले धितोपत्र व्यवसायी (धितोपत्र दलाल तथा धितोपत्र व्यापारी) नियमावली,२०६४ को नियम १२ को ‘२’ मा भएको व्यवस्था विपरित सेयर बिक्री गर्न भन्दै यसअघि दुई पटक सूचना निकालेको थियो ।
सूचना निष्कासन गर्दैै ब्रोकरका बर्तमान प्रमोटर सेयर होल्डरहरुले उक्त सेयर खरिद गर्न चाहेमा २०० रुपैयाँ प्रतिकित्तामा न्यूनतम १०० कित्तादेखी १० ले गुणा हुनेगरी अधिकतम २८ हजार ३८० कित्तासम्म खरीद गर्न सक्ने जनाएको थियो । उक्त सेयर खरिद गर्न चाहनेले दलालको अनामनगरस्थित कार्यालयमा ३५ दिनभित्र आवेदन दिनुपर्ने शुुक्रबार निकालेको सूचनामा उल्लेख थियो । एकभन्दा बढी खरिद निवेदनहरु आएमा पहिला दर्ता गर्ने निबेदकलाई पहिलो प्राथमिकता दिइने समेत जनाएको थियो ।
‘३५ दिनभित्र बर्तमान प्रमोटरहरुको कुनै निवेदन नआएको खण्डमा नियमानुसार कम्पनी रजिस्ट्रार कार्यालय, सेबोन, नेप्से लगाएत सबै नियामक निकाएहरुको ऐन, नियम र योग्यता पुगेको गैरप्रमोटर व्यक्तिलाई सो सेयर बिक्री गरिनेछ’ सूचनामा उल्लेख थियो ।
धितोपत्र व्यवसायी (धितोपत्र दलाल तथा धितोपत्र व्यापारी) नियमावली,२०६४ को नियम १२ को ‘२’ मा ‘धितोपत्र दलालको सेयरधनीले आफुले ग्रहण गरेको सेयर अनुमतिपत्र प्राप्त भएको वा आफ्नो नाममा कायम हुन आएको मितिले एक वर्ष पूरा नभएसम्म बिक्री वा नामसारी गर्न सक्ने छैन’ भन्ने व्यवस्था गरेको छ ।
बोर्डको उक्त व्यवस्था अनुसार ब्रोकर सञ्चालनमा आएको एक वर्षसम्म सेयर बिक्री गर्न पाइने छैन । तर, भोले गणेश सेक्युरिटीजले सिमित कार्य गर्ने गरी २०८० वैशाख १८ गते धितोपत्र बोर्डबाट आयशपत्र पाएको हो । यो ब्रोकर २०८० भदौ १२ गते विधिवतरुपमा उद्घाटन भएर सञ्चालनमा आएको हो ।
ब्रोकरले धितोपत्र बोर्डबाट आयशपत्र पाएको करिब ९ महिना र सञ्चालनमा आएको करिब ५ महिनामा नै संस्थापत्र सेयर बिक्री गर्न खोजेको थियो ।
धितोपत्र बोर्डका अध्यक्ष रमेश हमालले पुँजी बजारको बृहतत्तर विकास गर्न भन्दै नयाँ ब्रोकरलाई लाईसेन्स दिएका थिए । तर, एक वर्ष नै नभइ सेयर बिक्रीका सूचना आउन थालेका छन् ।