जारमा किरा भेटिएपछि काठमाडौं महानगरद्वारा पानी कम्पनीलाई १ लाख रुपैयाँ जरिवाना

काठमाडौं । काठमाडौं महानगरपालिकाले त्रिकोण बेभरेज इन्टस्ट्रीजलाई १ लाख रुपैयाँ जरिवाना तिराएको छ ।

महानगरपालिकाको बजार अनुगमन समितिले अनुगमनका क्रममा पानीको जारमा किरा भेटिएपछि जरिवाना तिराइएको महानगरका निरीक्षक अधिकृत डा. अवशेष झाले जानकारी दिए ।

‘हामीले उनीहरुको उद्योगमा पनि निरिक्षण गर्यौ । बजारमा पठाईएको एउटा जारमा किरा भेटिएकाले जरिवाना तिराइएको हो’ उनले भने ।

महानगरले बलाजु औद्योगिक क्षेत्रमा रहेको उक्त कम्पनीको कारखाना पनि अनुगमन गरेको थियो । जरिवानासहित महानगरले अब उप्रान्त जारमा पानी भर्नुअघि निर्मलीकरण गरीट भर्न र ब्याज रिपोर्ट पानी ढुवानीकर्तालाई प्रत्येक महिना उपलब्ध गराउन पनि कम्पनीलाई निर्देशन दिएको छ ।

पछिल्लो समय काठमाडौं महानगरले बजार अनुगमनलाई तीव्रता दिएको छ । डा. झाकाअनुसार उपभोक्ताले शुद्ध र खाद्य वस्तुको प्रयोग गर्न पाउने अधिकारलाई सुनिश्चित गर्नका लागि अनुगमनलाई तीव्रता दिइएको बताए ।