काठमाडौं महानगरभित्रका ३ वटा सडकलाई एकतर्फी बनाउने तयारी

काठमाडौं । काठमाडौँ महानगरपालिकाले ३ वटा सडकखण्डमा एकतर्फी सवारी सञ्चालन गर्ने तयारी गरेको छ ।

महानगरपालिकाका ट्राफिक विज्ञ सल्लाहकार जगतमान श्रेष्ठका अनुसार अहिले दोहोरो सवारी सञ्चालन भइरहेका ३ सडकखण्डलाई एकतर्फी बनाउन लागिएको हो ।

अब काठमाडौं र ललितपुर जोड्ने सेतोपुल, गुसिङ्गाल, मिलन मार्ग हुँदै त्रिपुरेश्वर आउने सडकमा त्रिपुरेश्वरबाट त्यो सडक खण्डमा प्रवेश गर्न पाइने छैन । त्यस्तै, जमल र दरबारमार्गबाट रत्नपार्क आउँदा त्रिचन्द्र क्याम्पस अगाडिबाट बायाँ मोडेर गणेशस्थान, प्रज्ञाभवन हुँदै कमलादी मोडतर्फ आउन नपाइने बनाइनेछ ।

पुतली सडकबाट काठमाडौं प्लाजा हुँदै हात्तीसारतर्फको सडक खण्डमा अब प्लाजाबाट बायाँ मोडिन पाइने छैन । यहाँदेखि महेन्द्र शालिकसम्मको सडकलाई एकतर्फी बनाउने तयारी भएको श्रेष्ठले बताए ।