इन्द्रजात्रामा हेर्न गएका युवकमाथि धारिलो हतियार प्रहार, अस्पताल पुर्‍याउँदा पुर्‍याउँदै मृत्यु

काठमाडौं । इन्द्रजात्रा हेर्न गएका एक युवकको धारिलो हतियार प्रहारबाट हत्या भएको छ । सोमबारराति जात्रा हेर्न न्युरोड पुगेका ओखलढुंगाको लिखु-४ का १७ वर्षीय शनी कार्कीको हत्या भएको हो ।

धारिलो हतियार प्रहारबाट घाइते भएका उनको अस्पताल पुर्‍याउँदा पुर्‍याउँदै मृत्यु भएको हो । घाइते कार्कीलाई ट्रमा सेन्टरबाट रिफर गरेर मनमोहन अस्पताल पुर्‍याउँदा मृत्यु भएको प्रहरीले जनाएको छ ।

उनको छातीमा धारिलो हतियार प्रहार भएको थियो ।

घटनामा संलग्न भएको भन्दै प्रहरीले शंकास्पद दुई जनालाई नियन्त्रणमा लिएको छ । उनीहरुमाथि अनुसन्धान जारी रहेको जिल्ला प्रहरी परिसर काठमाडौंका एसपी कुमुद ढुंगेलले जानकारी दिए ।